Vaşinqton Ərəbistan dənizində 20-yə yaxın hərbi gəmi cəmləşdirib

Amerika hərbçiləri Ərəbistan dənizində ABŞ Hərbi Dəniz Qüvvələrinin təxminən 20 hərbi gəmisi və dəstək gəmisindən ibarət qruplaşma cəmləşdirib.

''The Daily Baku''nun məlumatına görə, "Fox News" telekanalı bu barədə mənbələrə istinadən xəbər yayıb.

Məlumata görə, qruplaşmaya "USS Abraham Lincoln" və "USS George H.W. Bush" təyyarədaşıyan gəmilərinin rəhbərlik etdiyi iki təyyarədaşıyan zərbə qrupu, eləcə də 11-ci Dəniz Ekspedisiya Bölməsini daşıyan "USS Boxer" amfibiya hücum gəmisinin rəhbərliyi ilə amfibiya hücum qrupu daxildir.

Telekanal qeyd edir ki, gəmilərdə təxminən 20 000 dənizçi və dəniz piyadası yerləşdirilib.

Regionda Amerikanın ümumilikdə 24 hərbi gəmisi var, o cümlədən Şərqi Aralıq dənizində və Yunanıstanın Krit adasındakı Souda körfəzindəki ABŞ Hərbi Dəniz Qüvvələrinin bazasında yerləşən dörd idarə olunan raket esminesi.