İsrailli politoloq : Prezident İlham Əliyev qurucu lider missiyasını həyata keçirir

Azərbaycan Respublikasının Prezidenti İlham Əliyevin  doğum günü bir daha təkcə şəxsi tarix kimi deyil, eyni zamanda dərin siyasi və dövlətçilik məzmunu daşıyan rəmzi hadisə kimi yadda qaldı.

Bunu "The Daily Baku" - ya açıqlamasında israilli politoloq Yuri Boçarov deyib. 

O, qeyd edib ki, Prezident İlham Əliyev ənənəvi doğum gününü ailə çevrəsində qeyd etmək əvəzinə, bu günü azad edilmiş torpaqlarda — Xankəndi və Ağdamda keçirdi. 

"O, doğma yurdlarına qayıdan sakinlərlə görüşdü, yeni obyektlərin açılışında iştirak etdi və gələcək infrastruktur layihələrinin təməlini qoydu. Bu seçim özü-özlüyündə həm Azərbaycan cəmiyyətinə, həm də beynəlxalq ictimaiyyətə ünvanlanmış aydın və qəti mesajdır".

Politoloq vurğulayıb  ki, İlham Əliyevin beynəlxalq arenadakı uğurları, Azərbaycanın suverenliyinin möhkəmləndirilməsi və regionda geosiyasi balansın dəyişdirilməsindəki rolu artıq geniş şəkildə məlumdur və müasir tarixin ayrılmaz hissəsidirr:"Lakin məhz doğum gününün belə bir formatda keçirilməsi onun idarəetmə fəlsəfəsini daha aydın şəkildə nümayiş etdirir.

İlham Əliyev şəxsi və ailəvi baxımdan əhəmiyyətli bir gündə belə dövlət başçısı olaraq fəaliyyətini davam etdirən liderdir. Bu, onun üçün Vətənə xidmətin formal xarakter daşımadığını, gündəlik və davamlı bir məsuliyyət olduğunu açıq şəkildə göstərir, "-deyə politoloq əlavə edib.

Y. Boçarov bildirib ki, 44 günlük Vətən müharibəsində qazanılan qələbə Azərbaycanın ərazi bütövlüyünü bərpa etməsi ilə bitdi və uzun illər davam edən ədalətsizliyə son qoyuldu .

" Lakin bu missiya bununla bitmir. Bu gün Prezident İlham Əliyev daha mürəkkəb və uzunmüddətli bir vəzifəni — qurucu lider missiyasını həyata keçirir. Torpaqları azad etmək həyati zərurət idi, lakin onları dirçəltmək, iqtisadiyyatı bərpa etmək, infrastruktur qurmaq və insan həyatını geri qaytarmaq bundan da mühüm mərhələdir. Onun doğum gününü Xankəndi və Ağdamda keçirməsi bu prosesin dövlət başçısı üçün mütləq prioritet olduğunu açıq şəkildə nümayiş etdirir.

Bu yanaşma Azərbaycan cəmiyyəti üçün də aydın mesajdır. Prezident İlham Əliyev bütün vətəndaşlara — fəhlələrə, mühəndislərə, mütəxəssislərə, sahibkarlara və idarəetmə sistemində çalışan hər kəsə — göstərir ki, Vətənə xidmət hər bir vəzifənin əsas mahiyyətidir. Dövlət maraqları, milli məsuliyyət və gələcək nəsillər qarşısında öhdəlik şəxsi amillərdən üstün tutulmalıdır.

Məhz bu liderlik modeli Azərbaycanda məsuliyyət, intizam və yaradıcı əməyə əsaslanan yeni siyasi və ictimai mədəniyyət formalaşdırır və ölkənin davamlı inkişafını, bərpasını və uzunmüddətli tərəqqisini təmin edir." - politoloq deyib