Yeganə Abbasova: İlk meyit orqan transplantasiyasından sonra donor olmaq istəyənlərin sayı artıb

Azərbaycanda ilk meyit orqan transplantasiyasından sonra orqan donoru olmaq istəyənlərin sayı artıb.

"The Daily Baku" xəbər verir ki, bunu Səhiyyə Nazirliyinin Orqan Donorluğu və Transplantasiyası üzrə Koordinasiya Mərkəzinin İdarə Heyətinin sədri Yeganə Abbasova “Qafqazda ilk ürək transplantasiyası: Azərbaycan səhiyyəsinin tarixi nailiyyəti və gələcək perspektivlər” mövzusunda keçirilən dəyirmi masa zamanı bildirib.

Onun sözlərinə görə, ölkədə ilk meyit orqan transplantasiyasının həyata keçirilməsindən sonra donor olmaq üçün müraciət edənlərin sayı 1200-ü keçib. Yeganə Abbasova qeyd edib ki, bu sahədə institusional əsasların formalaşdırılması məqsədilə ilkin mərhələdə hüquqi baza yaradılıb.

O vurğulayıb ki, bu çərçivədə vahid informasiya bazasının əsasnaməsi hazırlanıb və sistem istifadəyə verilib. Sözügedən bazaya transplantasiya əməliyyatlarını həyata keçirən bütün xəstəxanalar, eləcə də ilkin mərhələdə orqan gözləyən şəxslərin siyahısı daxil edilib.

Koordinasiya Mərkəzinin sədri bildirib ki, yaradılan mexanizmlər orqan donorluğu və transplantasiya prosesinin daha şəffaf və koordinasiyalı şəkildə aparılmasına imkan yaradır və gələcəkdə bu sahədə müraciətlərin daha da artacağı gözlənilir.