Yaşıl enerji ittifaqı: Azərbaycan və Türkiyənin regional sabitlik və inkişaf yolunda birgə rolu

Azərbaycanın təşəbbüsləri yalnız ölkəmiz üçün deyil, həmin təşəbbüsə qoşulan bütün iştirakçı ölkələr üçün faydalı nəticələr verir. Yaşıl enerji təşəbbüsü bu gün onlarla ölkənin maraqlarına cavab verir və gələcəkdə bu layihəyə qoşulan ölkələrin sayının artması da mümkündür.

Bunu “The Daily Baku”-ya Milli Məclisin deputatı Aydın Mirzəzadə deyib.

Aydın Mirzəzadə qeyd edib ki, dünya ölkələri ekologiyanın qorunmasına və yaşıl enerji faktorunun inkişafına böyük diqqət yetirir. “Azərbaycan həm ənənəvi enerji mənbələrinə malikdir, həm də bu sahədə xarici təcrübəni öyrənir, öz təşəbbüslərini irəli sürərək nümunə göstərir. Ölkəmizdə ard-arda tikilən bərpa olunan enerji stansiyaları Azərbaycanın bu sahəyə ciddi yanaşmasının göstəricisidir,” – deyə deputat bildirib.

O əlavə edib ki, layihənin iştirakçısı olan ölkələrin hər birinin xüsusi rolu vardır: “Gürcüstan və Türkiyə bu məsələdə önəmli tərəfdaşlardır. Xüsusilə Türkiyə Azərbaycanın strateji müttəfiqi və dostudur. Ölkəmizə yatırımlarını davam etdirərək, iqtisadi sahədə 20 milyard ABŞ dollarından çox vəsait qoyub və gələcəkdə bu göstərici daha da artacaqdır.”

Deputat Mirzəzadə qeyd edib ki, enerji ötürülməsi yalnız bir xəttin çəkilməsi demək deyil. “Bunun üçün müvafiq strukturların qurulması, kadrların hazırlanması və sistemin kəsintisiz fəaliyyətinin təmin edilməsi olduqca vacibdir. Xəttin bir hissəsi Türkiyədən keçdiyindən, Türkiyənin hazırlığı və məsələlərə ciddi yanaşması önəm daşıyır. Görünür ki, Türkiyə üzərinə düşən məsuliyyəti yüksək səviyyədə yerinə yetirir, texniki məsələlərin həllində operativlik göstərir və ortaya çıxan çətinlikləri birlikdə aradan qaldırır,” – deyə o vurğulayıb.

Aydın Mirzəzadə bildirib ki, bundan sonra da Azərbaycanın dünyaya çıxışında və iqtisadi təşəbbüslərində Türkiyənin rolu böyük olacaq: “ Qardaş ölkə ilə birgə ümumi maraqlara xidmət edən, regiona sabitlik, inkişaf və əməkdaşlıq gətirən təşəbbüsləri irəli sürəcəyik.”