Xaricdə Təhsil üzrə Dövlət Proqramının əhatə etdiyi universitet və proqramların siyahısı təsdiqlənib

The Daily Baku xəbər verir ki, bu barədə Elm və Təhsil Nazirliyi rəsmi internet saytında məlumat yaymışdır. Ölkə Prezidentinin müvafiq Sərəncamına əsasən təsdiq olunmuş "Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı" çərçivəsində 2026/2027-ci tədris ilində dünyanın nüfuzlu universitetlərinin bakalavriat, magistratura və doktorantura səviyyələri üzrə maliyyələşdiriləcək təhsil proqramlarının siyahısı müəyyən edilib.

Təsdiq olunmuş yeni siyahıya əsasən, namizədlərə 15 prioritet ixtisas istiqaməti üzrə dünyanın 33 ölkəsini təmsil edən 231 nüfuzlu ali təhsil ocağında tədris olunan ümumilikdə 4121 proqram üzrə təhsil almaq imkanı yaradılıb.

Əvvəlki illə müqayisədə nəzərə çarpan dəyişikliklər aşağıdakılardır.  Dövlət Proqramının ümumi miqyası (15 prioritet ixtisas, 33 ölkə, 231 universitet, 500 nəfərlik kvota) saxlanılsa da, qəbul mexanizmi və tətbiq qaydaları nəzərəçarpacaq dərəcədə sərtləşdirilib: ilk dəfə olaraq müraciət sayından asılı şəkildə keçid ballarının tətbiqi açıq şəkildə elan olunur, TOP-10 universitetlər üzrə siyahıdan kənar ixtisaslara müraciət imkanı məhdudlaşdırılaraq UCL bu istisnadan çıxarılır, ARWU (Shanghai) reytinqi əlavə edilir, doktorantura səviyyəsində isə yeni keyfiyyət filtri tətbiq olunaraq proqramın TOP-200 reytinqdə yer alması məcburi şərtə çevrilir.

Dövlət Proqramında əvvəlki ilə nisbətən daha selektiv, daha rəqabətə əsaslanan və texniki uyğunluq tələb yanaşma daha qabarıq nəzərə çarpır.