Venesuela ABŞ şirkətləri ilə energetika üzrə memorandumlara imza atıb

Venesuela Amerikanın "Overseas Oil Company" və "Crossover Energy Holding" şirkətləri ilə anlaşma memorandumu imzalayıb.

"The Daily Baku"nun məlumatına görə, imzalanma mərasimi Miraflores sarayında prezident səlahiyyətlərini icra edən Delsi Rodriqesin iştirakı ilə baş tutub.

"ABŞ və Venesuelanın maraqları üst-üstə düşür və biz bir-birini tamamlayaraq Amerika və Venesuela xalqlarının ümumi rifahına töhfə verə bilərik", - Rodriqes "Venezolana de Television" telekanalının efirində bildirib.

O, həmçinin Ağ Evin energetika sahəsində Milli Şurasının icraçı direktoru Carrod Eyqenin rəhbərlik etdiyi amerikalı sahibkarlar nümayəndə heyətini salamlayıb və onlardan ABŞ Prezidenti Donald Trampa Karakasın Vaşinqtonla uzunmüddətli münasibətlər qurmağa hazırlığı barədə məlumat vermələrini xahiş edib.