ABŞ Dövlət katibi Marko Rubio Kuba rəhbərliyini Birləşmiş Ştatların rəqibləri olan dövlətlərin kəşfiyyat xidmətləri nümayəndələrinə öz ərazisindən istifadəyə şərait yaratmaqda günahlandırıb.
''The Daily Baku'' xəbər verir ki, bu barədə EFE agentliyi onun bu sözlərindən sitat gətirib.
"Biz Amerikanın düşmənlərinin bizdən 90 mil (təxminən 145 km) məsafədə hərbi bazalar və ya kəşfiyyat əməkdaşları yerləşdirməsinə dözmək niyyətində deyilik", - deyə o bildirib.
Qeyd olunub ki, Rubio hər hansı bir ölkənin adını xüsusi çəkməsə də, agentlik Kubanın əvvəlcə SSRİ, daha sonra isə Rusiya ilə olan çoxillik tarixi əlaqələrinə diqqət çəkir. Bununla yanaşı, son onilliklər ərzində Havana iqtisadi və texnoloji sahələrdə Çinlə də əməkdaşlığını genişləndirməkdədir.
"Orada müsbət dəyişikliklər yalnız ciddi iqtisadi islahatlar sayəsində baş verə bilər. Lakin bu, iqtisadi baxımdan səriştəsiz olan hazırkı rəhbərliklə qeyri-mümkündür", - deyə Kubadakı mövcud vəziyyəti şərh edən dövlət katibi əlavə edib.
Agentlik xatırladıb ki, ABŞ Prezidenti Donald Trampın Administrasiyası bu ilin yanvar ayından etibarən Kubaya qarşı təzyiqləri daha da gücləndirib. Havanaya qarşı yanacaq tədarükünə qadağa tətbiq edilib. Bundan əlavə, Tramp Kubada hakimiyyət dəyişikliyinin zəruriliyini dəfələrlə dilə gətirib.
© 2026 The Daily Baku. Bütün hüquqlar qorunur.