Urbanizasiya İƏT ölkələrinin əsas inkişaf çağırışlarından biri kimi göstərilib

İslam Əməkdaşlıq Təşkilatı (İƏT) ölkələrində urbanizasiya sürətlənir və 2035-ci ildə əhalinin 58 %-i şəhərlərdə yaşayacaq.

"The Daily Baku" xəbər verir ki, bu barədə SESRIC-in (İƏT-in Statistik, İqtisadi və Sosial Tədqiqatlar və Təlim Mərkəzi) İnformasiya və informasiya texnologiyaları departamentinin direktoru Əbu Naser Huda Bakıda Ümumdünya Şəhərsalma Forumunun 13-cü sessiyası (WUF13) çərçivəsində keçirilən "Şəhər inkişafında yaşıl texnologiyalar: dayanıqlı və dözümlü şəhərlərə keçidin sürətləndirilməsi" adlı sessiyada bildirib.

Onun sözlərinə görə, şəhər əhalisinin payı artıq 2014-cü ildəki 48,7 %-dən 2023-cü ildə 52,7 %-ə qədər artıb və proqnozlara əsasən, 2035-ci ilə qədər 58 %-ə çatacaq:

"Belə sürətli artım mənzil təminatı, nəqliyyat, su təchizatı, energetika və tullantıların idarə olunması sistemlərinə nəhəng yük yaradır".

O, İƏT ölkələrini təxirəsalınmadan şəhər inkişafının ağıllı və dayanıqlı modellərinə keçməyə çağırıb.