Türkmənistan Xəzərlə bağlı yüksək səviyyəli görüşə ev sahibliyi edəcək

Türkmənistan Prezidenti Sərdar Berdiməhəmmədov 2026-cı ilin oktyabr ayının əvvəlində Xəzər dənizinin ekologiyası məsələlərinə dair yüksək səviyyəli görüş keçirmək planlarını açıqlayıb.

"The Daily Baku" Türkmənistan mediasına istinadən xəbər verir ki, bu barədə o Astanada keçirilən regional ekoloji sammitin plenar sessiyasında bildirib.

Onun sözlərinə görə, qarşıdan gələn görüş Xəzəryanı ölkələrin əməkdaşlığını ekoloji rifahın təmin edilməsi və Xəzərin nadir təbiətinin qorunması sahəsində yeni mərhələyə çıxarmalıdır.

Berdiməhəmmədov vurğulayıb ki, Türkmənistan bir Xəzəryanı dövlət kimi beynəlxalq səviyyədə ekoloji gündəliyi fəal şəkildə irəli sürür: "Biz BMT-də Xəzər ekoloji təşəbbüsü ilə çıxış etdik, onun həyata keçirilməsi konsepsiyasını hazırladıq və bütün Xəzəryanı ölkələrə göndərdik".