Türkiyəli ekspert Mehmet Emir Aksoy: Azərbaycan regional balansları yenidən formalaşdırır

Son dövrlər Azərbaycan Prezidenti İlham Əliyevin apardığı intensiv  diplomatiya təkcə müvəqqəti böhranların idarə olunması və ya dövrü təmaslar kimi qiymətləndirilməməlidir. Bu proses Bakının Qafqaz mərkəzli geosiyasi mövqeyini Asiya ilə Avropa arasında davamlı və çoxşaxəli diplomatik körpüyə çevirmə strategiyasının tərkib hissəsidir.

Bu fikirləri "The Daily Baku" - ya açıqlamasında türkiyəli ekspert, beynəlxalq münasibətlər üzrə mütəxəssis Mehmet Emir Aksoy bildirib.

Ekspertin sözlərinə görə, Azərbaycan rəhbərliyi artıq klassik diplomatik reflekslərdən kənara çıxaraq “eyni zamanda əlaqə – eyni zamanda balans” prinsipinə əsaslanan siyasət yürüdür. Moskva, Ankara, Tehran, Brüssel və Orta Asiya paytaxtları ilə paralel şəkildə aparılan  danışıqlar Azərbaycanın yalnız regional oyunçu deyil, müxtəlif güc mərkəzləri arasında tarazlıq yarada bilən rasional dövlət olduğunu nümayiş etdirir.

Mehmet Emir Aksoy vurğulayıb ki, bu diplomatik fəallıq passiv vasitəçilik deyil, istiqamətverici və təşəbbüskar bir siyasətin göstəricisidir. Onun fikrincə, Azərbaycanın diplomatik xətti hərbi potensialla sistemli şəkildə uzlaşdırılıb.

Ekspert qeyd edib ki, 2020-ci il Vətən müharibəsindən sonra formalaşan reallıq Azərbaycanın təkcə döyüş meydanında deyil, diplomatik masada da qazanan tərəf olduğunu sübut etdi.

Onun sözlərinə görə, Azərbaycan Ordusunun modernləşdirilməsi, texnoloji imkanlarının artırılması və peşəkar strukturu diplomatik proseslərin arxa planında səssiz, lakin təsirli balans amili rolunu oynayır. Bu amil Azərbaycanın təkcə Cənubi Qafqazda deyil, həmçinin Xəzər hövzəsi və Orta Asiya miqyasında etibarlı sabitlik aktoruna çevrilməsinə şərait yaradır.

Ekspert vurğulayıb ki, Asiyadan Avropaya uzanan enerji, logistika və nəqliyyat marşrutlarının mərkəzində yerləşən Azərbaycan bu strateji mövqeyini artıq yalnız coğrafiya ilə deyil, düşünülmüş diplomatiya və güclü ordu potensialı ilə möhkəmləndirir. Prezident İlham Əliyevin son dövrlərdə həyata keçirdiyi diplomatiya  məhz vahid dövlət strategiyasının real təzahürüdür.