Türk ekspert: ABŞ-ın İsraildəki səfirlik personalına ölkəni tərk etmək üçün icazə verməsi gözlənilən hadisələrin ən güclü siqnalı idi

ABŞ-ın İsraildəki səfirlik personalına ölkəni tərk etmək üçün icazə verməsi gözlənilən hadisələrin ən güclü siqnalı idi.

Bunu  Türk ekspert Emre Diner “The Daily Baku”ya açıqlamasında bildirib.

Onun sözlərinə görə, ilk zərbənin İsrail tərəfindən endiriləcəyi ehtimalı əvvəldən yüksək idi.
Ekspert zamanlamaya da diqqət çəkdiyini bildirib. 

"Yəhudi xalqına qarşı qədim Persiyada planlaşdırılmış qətliamın qarşısının alınmasını simvolizə edən və fevralın sonu  martın əvvəlində qeyd olunan Purim bayramının yaxınlaşması bu qərarda simvolik rol oynamış ola bilər".

Emre Diner hesab edir ki, ABŞ–İsrail–İran qarşıdurması 12 günlük müharibədən daha uzun davam edə bilər. 

Ekspert əlavə edib ki, xarici hərbi təzyiq rejimi zəiflədə bilər, lakin avtomatik olaraq alternativ siyasi sistem yaratmır. Onun sözlərinə görə, Vaşinqtonun hava hücumları ilə müəyyən nəticələr əldə etməsi mümkün olsa da, rejim dəyişikliyi yalnız hava əməliyyatları ilə təmin edilə bilməz.

O əlavə edib ki, İranın müttəfiqlərinin, o cümlədən Yəməndəki husilərin və daha geniş regional şəbəkələrin prosesə daha birbaşa şəkildə qoşulma ehtimalı yüksəkdir.

“Əgər eskalasiya nəzarətdən çıxarsa, dünya çox təhlükəli və dağıdıcı qlobal qarşıdurma mərhələsinə sürüklənə bilər,” – deyə Emre Diner fikrini tamamlayıb.