Tural Gəncəliyev: 1918-ci il qırğınları bəşəriyyətə qarşı ağır cinayətdir

1918-ci ilin mart ayında azərbaycanlılara qarşı törədilmiş qırğınlar təkcə bir xalqa qarşı deyil, bütövlükdə bəşəriyyətə qarşı yönəlmiş ağır cinayətlərdən biridir.

Bunu  "The Daily Baku" ya açıqlamasında Milli Məclisin deputatı Tural Gəncəliyev bildirib. 

Onun sözlərinə görə, 31 mart hadisələrinin hər il xatırlanması təsadüfi deyil və bu tarix yalnız anım günü kimi deyil, həm də tarixi yaddaşın qorunması baxımından xüsusi əhəmiyyət daşıyır. “Biz bu hadisələri niyə daim vurğulayırıq və hər il qeyd edirik? Çünki belə faciələr müzakirə olunmadıqda, gündəmdə saxlanılmadıqda onların təkrarlanma ehtimalı artır,” – deyə deputat vurğulayıb.

Tural Gəncəliyev qeyd edib ki, 1918-ci ilin mart hadisələri tək bir günlə məhdudlaşmayıb. Onun sözlərinə görə, bu qırğınlar həftələrlə davam edib və Azərbaycanın müxtəlif bölgələrində – Qarabağda, Bakıda, Qubada, Gəncədə və digər ərazilərdə planlı və sistemli şəkildə həyata keçirilib.

Deputat bildirib ki, əgər bu hadisələr yalnız bir bölgədə baş versəydi, bunu müxtəlif bəhanələrlə izah etməyə çalışanlar ola bilərdi. “Ancaq burada söhbət sırf mülki əhaliyə qarşı törədilmiş cinayətlərdən gedir. Dinc insanlara qarşı həyata keçirilən bu qırğınlar coğrafi baxımdan ölkənin geniş ərazilərini əhatə edib və bu da onun məqsədli və sistemli xarakter daşıdığını göstərir,” – deyə o qeyd edib.

Onun sözlərinə görə, bu hadisələrə Azərbaycanın müstəqilliyini bərpa etməsindən sonra düzgün siyasi və hüquqi qiymət verilib. Deputat xatırladıb ki, Ümummilli Lider Heydər Əliyev 1998-ci ildə 31 mart tarixinin Azərbaycanlıların Soyqırımı Günü kimi qeyd olunması barədə müvafiq sənəd imzalayıb.

Tural Gəncəliyev vurğulayıb ki, bu tarix hər zaman xatırlanmalı və gələcək nəsillərə çatdırılmalıdır. “Biz bu hadisələri unutmamalı, daim xatırlatmalı və həm özümüz, həm də başqaları üçün bundan nəticə çıxarmalıyıq,” – deyə deputat bildirib.

O əlavə edib ki, tarix göstərir ki, dinc insanlara qarşı zorakılıq törədən qüvvələr heç vaxt uğur əldə etmir. “Mülki əhaliyə qarşı əl qaldıran istənilən güc, istənilən dövlət tarix boyu uğursuzluğa məhkum olub. Bunun bariz nümunələrindən biri də Ermənistandır,” – deyə o qeyd edib.

Deputat bildirib ki, 1918-ci ildə baş verən hadisələr sonrakı dövrlərdə də təkrarlanıb. Onun sözlərinə görə, 1992-ci il fevralın 26-da Xocalıda törədilən faciə bu siyasətin davamı idi.

“Əslində onların məğlubiyyəti elə bu cinayətləri törətdikləri gündən başlayıb. Sadəcə bunu dərhal dərk etmirdilər,” – deyə Tural Gəncəliyev fikrini yekunlaşdırıb.