Rus politoloq : “1918-ci il faciəsi beynəlxalq səviyyədə tanınmalı və unudulmamalıdır”

1918-ci il hadisələri hələ də tam siyasi-hüquqi qiymətini almayıb.

Bunu "The Daily Baku" ya açıqlamasında rus politoloq, Rusiya Federasiyasının birinci dərəcəli dövlət müşaviri Tatyana Poliskova bildirib.

Onun sözlərinə görə, həmin dövrdə baş verənlər etnik mənsubiyyətə görə insanların kütləvi şəkildə məhv edilməsi idi və bu, birmənalı şəkildə soyqırımı kimi qiymətləndirilməlidir: “On minlərlə insanın sırf etnik kimliyinə görə öldürülməsi soyqırımıdır və bu tarix mütləq şəkildə beynəlxalq səviyyədə tanınmalıdır. Bu, sadəcə keçmişin faciəsi deyil, həm də bu gün üçün dərsdir”.

Politoloq qeyd edib ki, bu cür hadisələrin unudulmaması və daim gündəmdə saxlanılması gələcəkdə oxşar faciələrin qarşısını almaq baxımından vacibdir. Onun fikrincə, yalnız arxiv sənədlərinə istinad etməklə kifayətlənmək olmaz, eyni zamanda güclü informasiya siyasəti də aparılmalıdır: “Tarixi faktlar vacibdir, amma bu, kifayət deyil. Bu hadisələr haqqında beynəlxalq mediada yazılmalı, qərar verən platformalarda müzakirə olunmalıdır. Əks halda, həqiqətin tanınması çətinləşir”.

Tatyana Poliskova vurğulayıb ki, beynəlxalq səviyyədə təsir imkanlarının artırılması üçün lobbiçilik mexanizmlərinin qurulması da mühüm əhəmiyyət daşıyır: “Bəzi ölkələr uzun illər ərzində effektiv lobbi sistemləri qurublar və bu, onların mövqelərinin irəli çəkilməsində ciddi rol oynayır. Azərbaycan da bu istiqamətdə daha sistemli addımlar ata bilər”.

Ekspert hesab edir ki, Azərbaycanın son illərdə beynəlxalq ekspert icması ilə əlaqələri genişlənib, lakin bu proses paralel şəkildə xarici media ilə əməkdaşlıq və informasiya siyasəti ilə də gücləndirilməlidir.

O, həmçinin qeyd edib ki, regionda davamlı sülh üçün cəmiyyətlər arasında qarşılıqlı anlaşma və dialoq vacibdir. Bununla yanaşı, mövcud reallıqların düzgün dərk edilməsi və tarixə obyektiv yanaşma olmadan uzunmüddətli sabitliyin əldə olunması çətin görünür.

Sonda politoloq bildirib ki, düzgün strateji yanaşma və qarşılıqlı iradə olduğu təqdirdə, bu kimi faciələrin beynəlxalq səviyyədə tanınması istiqamətində real nəticələr əldə etmək mümkündür: “Dünyada kifayət qədər obyektiv düşünən insanlar var və onlar kimin haqlı olduğunu anlayırlar. Əgər sistemli şəkildə işlənilsə, bu məsələni məntiqi nəticəyə çatdırmaq mümkündür”.