QHT sədri: Gernika nümunəsi ilə verilən mesaj Azərbaycanın son 30 ildə keçdiyi yolla üst-üstə düşür

Gernika faciəsinin ildönümündə Prezident İlham Əliyevə təqdim olunan “Sülh və Barışıq üçün Gernika mükafatı” dərin siyasi və mənəvi məna daşıyır.

Bunu The Daily Baku-ya açıqlamasında QHT sədri Lamiyə İsazadə deyib.

Onun sözlərinə görə, 89 il əvvəl, aprelin 26-da Gernika şəhərində dinc əhaliyə qarşı törədilmiş bombardman yalnız bir şəhərin deyil, bütün bəşəriyyətin yaddaşında iz qoyan faciə kimi tarixə düşüb.
“Gernika bombalanması müharibənin ən dəhşətli simvollarından biridir. Bu gün həmin faciənin xatırlandığı bir gündə Azərbaycanın Prezidentinə belə bir mükafatın təqdim olunması həm simvolik, həm də məzmun baxımından çox önəmlidir”.

Ekspert qeyd edib ki, Prezident İlham Əliyev mükafatın təqdim olunma mərasimində səsləndirdiyi fikirlərlə sülh anlayışına daha geniş və dərin yanaşma ortaya qoyub.
“Bu çıxışdan aydın olur ki, sülh təkcə siyasi razılaşma deyil. Bu, həm də tarixi yaddaşın, yaşanmış acıların və gələcək qarşısında məsuliyyətin nəticəsidir”.

Lamiyə İsazadə vurğulayıb ki, Gernika nümunəsi ilə verilən mesaj Azərbaycanın son 30 ildə keçdiyi yolla üst-üstə düşür.
“Müharibənin ağrılarını yaşamış xalqlar sülhün dəyərini daha dərindən anlayır. Azərbaycan cəmiyyəti də uzun illər davam edən münaqişə, itkilər və qeyri-müəyyənlik fonunda bu anlayışı formalaşdırıb və bu gün artıq yeni mərhələyə keçid edir”.

Onun fikrincə, Prezidentin çıxışında sülh yalnız nəzəri anlayış kimi deyil, konkret nəticələr doğuran proses kimi təqdim olunur.
“Regionda iqtisadi əlaqələrin bərpası, nəqliyyat və ticarət imkanlarının genişlənməsi artıq müzakirə mövzusu deyil, real prosesə çevrilir. Bu isə onu göstərir ki, davamlı sülh yalnız diplomatik masalarda deyil, gündəlik həyatın içində möhkəmlənir”.

Ekspert diqqətə çatdırıb ki, çıxışda vətəndaş cəmiyyətinin roluna xüsusi önəm verilməsi də mühüm məqamlardandır.
“Dövlətlərarası münasibətlərlə yanaşı, xalqlar arasında etimadın qurulması da vacibdir. Müxtəlif səviyyələrdə dialoqun təşviqi gələcək sabitliyin əsas sütunlarından biridir”.

O əlavə edib ki, Prezidentin mesajında beynəlxalq faktorun rolu da açıq şəkildə vurğulanır.
“Uzunmüddətli münaqişələrin həlli üçün yalnız tərəflərin iradəsi kifayət etmir. Beynəlxalq dəstək və uyğun siyasi mühit də bu prosesdə həlledici rol oynayır”.

Sonda Lamiyə İsazadə qeyd edib ki, təqdim olunan mükafat sadəcə təltif deyil, həm də bir mesajdır.
“Bu mükafat keçmişin dərslərini xatırladır və eyni zamanda gələcəyə dair məsuliyyəti ön plana çıxarır. Prezidentin çıxışı bir daha göstərdi ki, sülh birdəfəlik əldə olunan nəticə deyil, o, davamlı diqqət, səylər və məsuliyyət tələb edən prosesdir. Gernikanın acı xatirəsi ilə Cənubi Qafqazda formalaşan yeni reallığın paralel təqdimatı isə çox aydın mesaj verir: tarixdən dərs çıxaran xalqlar gələcəyi daha sağlam qurur”.