Qəzza sülhməramlı missiyası ilə bağlı qeyri-müəyyənlik davam edir

Azərbaycanın Qəzzada mümkün beynəlxalq sülhməramlı əməliyyata qoşulması ətrafında bu həftə diplomatik müstəvidə bir sıra ictimai bəyanatlar səsləndirilmişdir. ABŞ-ın BMT yanında səfiri Maykl Valts tanınmış amerikalı jurnalist Hü Yuvittə (Hugh Hewitt) 22 dekabr 2025-ci il tarixində dərc olunmuş müsahibəsində Azərbaycan da daxil olmaqla bir sıra dövlətlərin Qəzza əməliyyatında iştirakının nəzərdə tutulduğunu bildirmişdir.

Azərbaycan Respublikası Prezidentinin xarici siyasət məsələləri üzrə köməkçisi Hikmət Hacıyevin eyni gün Yaponiyanın Nikkei nəşrinə verdiyi müsahibədə ifadə etdiyi fikirlərdən isə aydın olur ki, Azərbaycanın əməliyyata qoşulması barədə hələlik qərar verilməyib. Əməliyyatın mümkün parametrləri, mandatı və gücdən istifadə qaydaları ilə bağlı suallar qalmaqdadır.

Ehtimal etmək olar ki, əməliyyatda iştirak edəcək dövlətləri maraqlandıran əsas məsələ Qəzzada atəşkəsin birmənalı şəkildə təsbit olunması və göndəriləcək qüvvələr üçün təhlükə səviyyəsinin minimuma endirilməsidir. Hamas və İsrail arasında Misirin vasitəçiliyi ilə açıq qalan bir sıra məsələlərlə bağlı təmaslar davam etdiyi şəraitdə, hələlik dövlətlər əməliyyata qoşulmaqla bağlı yekun qərarlarını açıqlamağa tələsmirlər.

Bundan başqa, Azərbaycanın müttəfiqi və sülhməramlı əməliyyatlar sahəsində uzunmüddətli tərəfdaşı olan Türkiyənin Qəzza missiyasında mümkün iştirakına İsrailin qarşı çıxmasının Azərbaycan üçün əlavə həssaslıq yaratması da istisna olunmur.

Görünür ki, Azərbaycan əməliyyata qoşulmağın ABŞ ilə münasibətlərə gətirə biləcəyi faydalar və bunun yarada biləcəyi siyasi və təhlükəsizlik risklərinin qiymətləndirməsini davam etdirir.

"The Daily Baku" redaksiyası