Politoloq: Cey Di Vensin səfəri ABŞ-ın Cənubi Qafqaza artan marağının göstəricisidir

ABŞ-ın vitse-prezidenti Cey Di Vensin Cənubi Qafqaza səfəri ötən ilin avqustun 8-də Vaşinqtonda əldə olunmuş razılaşmalar üzrə gündəliyin irəli aparılmasına xidmət edən mühüm diplomatik addım kimi qiymətləndirilə bilər. Həmin görüşdə ABŞ, Azərbaycan və Ermənistan arasında həm sülh prosesini əhatə edən, həm də regionda logistika xətlərinin və kommunikasiya yollarının açılmasını nəzərdə tutan TRIPP layihəsi ilə bağlı vacib razılaşmalar əldə olunmuşdu.

Bu fikirləri "The DailyBaku"-ya politoloq, BMTM-in şöbə müdiri Mətin Məmmədli deyib.

Onun sözlərinə görə, vitse-prezidentin səfərinin əsas məqsədlərindən biri bu razılaşmaların icra mexanizmlərinin müzakirəsi və prosesin davamlılığının təmin edilməsi göstərilə bilər.

 "Ümumilikdə, Donald Tramp administrasiyası dövründə ABŞ-ın həm Cənubi Qafqazda, həm də Mərkəzi Asiyada daha fəal siyasət yürütməsi müşahidə olunur və bu səfər də Vaşinqtonun regiondakı mövqelərini gücləndirmək niyyətinin göstəricisi kimi dəyərləndirilir.

Məlumdur ki, hazırda postsovet məkanında və ona yaxın regionlarda kifayət qədər mürəkkəb geosiyasi proseslər baş verir. Belə bir şəraitdə ABŞ kimi qlobal aktorun yüksək səviyyəli nümayəndəsinin səfəri təsadüfi sayıla bilməz. Əksinə, bu addımın əsas hədəfi ABŞ üçün strateji əhəmiyyət kəsb edən bölgələrdə təsir imkanlarını artırmaq və yeni geosiyasi reallıqlar fonunda mövqelərini möhkəmləndirməkdir."

M.Məmmədlinin sözlərinə görə, Vaşinqton sammitindən sonra Azərbaycan və Ermənistan arasında sülh prosesi faktiki olaraq yeni mərhələyə daxil olub. Hazırda iki ölkə arasında silahlı qarşıdurma yoxdur və regionda nisbi sabitlik hökm sürür. Bununla belə, yekun sülh müqaviləsi hələ imzalanmayıb. Bu prosesə mane olan əsas amillərdən biri Ermənistan Konstitusiyasında Azərbaycana qarşı ərazi iddialarını ehtiva edən müddəaların mövcudluğudur.

Politoloq vurğulayıb ki, Azərbaycanın prinsipial mövqeyi davamlı sülhün təmin olunması üçün Ermənistanın bu hüquqi ziddiyyətləri aradan qaldırmasından ibarətdir. Onun fikrincə, Ermənistan hakimiyyəti ölkədə keçiriləcək seçkilərdən sonra yeni konstitusiyanın qəbulunu gündəmə gətirməyi planlaşdırır və bu baxımdan Cey Di Vensin səfəri Ermənistan daxilində gedən siyasi proseslərə də müəyyən təsir göstərə bilər.

Mətin Məmmədli əlavə edib ki, Cey Di Vens ABŞ-da ikinci ən yüksək siyasi fiqur hesab olunur və son illərdə bu səviyyədə bir rəsminin regiona səfəri baş verməyib. Bu fakt özü-özlüyündə ABŞ-ın Cənubi Qafqaza artan marağının bariz göstəricisidir.

Onun qənaətincə, vitse-prezidentin səfəri təkcə diplomatik təmaslar çərçivəsində qiymətləndirilməməlidir. Bu səfər eyni zamanda ABŞ-ın regionda uzunmüddətli strateji iştirak niyyətinin təsdiqi kimi dəyərləndirilə bilər. Bu isə Cənubi Qafqazın qlobal siyasi gündəmdə artan rolunu bir daha ön plana çıxarır.