Politoloq: Beynəlxalq münasibətlər sistemində həlledici amil gücdür

Prezident İlham Əliyevin yerli televiziya kanallarına verdiyi son müsahibə beynəlxalq münasibətlər sisteminin real mahiyyəti ilə bağlı mühüm mesajlarla yadda qaldı. Dövlət başçısının beynəlxalq hüququn dünya siyasətində faktiki olaraq işləməməsi ilə bağlı səsləndirdiyi fikirlər mövcud qlobal reallıqları dəqiq əks etdirir. 

Bunu politoloq, BMTM-in şöbə müdiri Mətin Məmmədli “The Daily Baku”ya açıqlamasında bildirib. 

Onun sözlərinə görə, Prezidentin vurğuladığı əsas məqam ondan ibarətdir ki, beynəlxalq münasibətlər sistemində idealist və liberal yanaşmaların iddia etdiyi kimi beynəlxalq təşkilatlar və hüquq normaları həlledici rol oynamır. 

“Xüsusilə 20–30 ilin təcrübəsi göstərir ki, beynəlxalq münasibətlərin əsas aktorları dövlətlərdir və hər şey onların maraqları üzərində qurulur. Xüsusilə böyük dövlətlər öz maraqlarını təmin etmək üçün beynəlxalq hüquqdan çox zaman siyasi alət kimi istifadə edirlər”, – deyə Mətin Məmmədli qeyd edib.

Politoloqun fikrincə, bu reallıq “haqlının gücü deyil, gücünün haqqı” prinsipinin işlədiyini açıq şəkildə nümayiş etdirir. Belə bir şəraitdə hər bir dövlət üçün ən rasional yol öz milli gücünü artırmaqdan keçir. “Prezident İlham Əliyev də çıxışında məhz bunu xüsusi vurğuladı: indiki beynəlxalq sistemdə dövlətlərin təhlükəsizliyini və maraqlarını təmin edən əsas faktor onların öz gücüdür”, – deyə o bildirib.

Mətin Məmmədli qeyd edib ki, Azərbaycan bu yanaşmanı illərdir ardıcıl şəkildə həyata keçirir və bunun ən bariz nümunəsi ölkənin öz ərazi bütövlüyünü bərpa etməsidir. “Azərbaycan təxminən 30 il ərzində beynəlxalq hüququn işləmədiyini birbaşa öz üzərində yaşayıb. Ərazilərimiz işğal altında olduğu halda, BMT Təhlükəsizlik Şurasının qəbul etdiyi dörd qətnamə icra olunmadı. Bu, beynəlxalq hüquq normalarının kağız üzərində qalmasının açıq sübutu idi”, – deyə politoloq vurğulayıb.

Onun sözlərinə görə, Azərbaycan məhz öz gücünə, düzgün hərbi-strateji planlamaya və balanslı xarici siyasətə söykənərək bu ədalətsizliyə son qoydu. “Bu gün Azərbaycan nümunəsi göstərir ki, real beynəlxalq münasibətlər sistemində hüquq yalnız güclə dəstəkləndikdə işlək olur. Prezident İlham Əliyevin səsləndirdiyi fikirlər həm qlobal reallıqların düzgün təhlili, həm də Azərbaycanın keçdiyi yolun siyasi fəlsəfəsinin ifadəsidir”, – deyə Mətin Məmmədli bildirib.