Pakistanın Xayber Paxtunxva əyalətinin Haripur şəhərində qaz kəmərinin partlaması və sonradan baş verən yanğın nəticəsində səkkiz nəfərin həyatını itirdiyi bildirilir.
“Dawn” qəzetinin yaydığı məlumata əsasən, partlayış axşam saatlarında Xattar sənaye zonasındakı zavod yaxınlığında yerləşən qaz xəttində baş verib.
Yanğın nəticəsində uşaqlar da daxil olmaqla səkkiz nəfər ölüb, 11 nəfər xəsarət alıb.
Hadisənin başvermə səbəbi hələ müəyyənləşdirilməyib. Yaralılar yaxınlıqdakı tibb müəssisələrinə çatdırılıb.
Rəsmi məlumatlara görə, alovlar hadisə yerindən təxminən 200 metr aralıda yerləşən yaşayış evlərinə də keçib. Qazın verilməsi dayandırılsa da, yanğın ən azı iki saat davam edib və söndürülməsi çətin olub.
Hazırda yanğın tam söndürülüb, insidentin səbəbləri ilə bağlı araşdırma aparılır.
© 2026 The Daily Baku. Bütün hüquqlar qorunur.