Osaka şəhərində davamlı inkişaf layihəsi təqdim olunub

Osakada TOD (Ictimai Nəqliyyat Yönümlü İnkişaf) çərçivəsində icra edilən "Umekita" layihəsi keçmiş yük ərazisini innovasiya və yaşıllıq mərkəzinə çevirib.

Bunu Yaponiyanın Qlobal Məsələlər İdarəsinin Şəhər İntibah Agentliyinin nümayəndəsi Fujita Ryo Bakıda keçirilən Ümumdünya Şəhərsalma Forumu (WUF13) çərçivəsində təşkil olunmuş "Davamlı şəhər inkişafı üçün tranzityönlü inkişaf" adlı tədbirdə bildirib.

Onun sözlərinə görə, bu layihə Qərbi Yaponiyanın ən böyük terminal stansiyası olan və gündəlik 2,5 milyon sərnişin qəbul edə bilən Osaka stansiyasının düz qarşısında yerləşir: "Layihənin məqsədi keçmiş 24 hektarlıq yük həyətini Kansai regionunda yaşıl mühit və innovasiyalar üçün vahid mərkəzə çevirməkdir. ​Bu 24 hektarlıq ərazi müxtəlif layihə qrafiklərinə malik iki hissəyə bölünüb. Osaka şəhər rəhbərliyinin hazırladığı vahid baş plana uyğun olaraq, torpaqların yenidən qurulması metodundan istifadə etməklə infrastrukturun inkişafı həyata keçirilir. ​Çoxfunksiyalı tikinti işlərini isə vahid baş plana uyğun şərtlər əsasında, açıq tenderlər vasitəsilə seçilmiş özəl tərtibatçılar yerinə yetirib".

"​TOD aspektlərinə gəldikdə isə, rahat və piyada gəzintisinə uyğun mühit yaratmaq məqsədilə ərazini əhatə edən piyada şəbəkəsi qurulub. Bu şəbəkə stansiyaları, Osaka stansiyasını, meydanları və binaları müxtəlif səviyyələrdə bir-birinə kəsintisiz şəkildə bağlayır. ​Bu layihənin ən fərqləndirici xüsusiyyəti stansiyanın düz yanında yerləşən irimiqyaslı yaşıl açıq sahənin olmasıdır. Belə ki, 4,5 hektarlıq bir park salınıb və fəlakət baş verəcəyi təqdirdə bu park 34 000-ə qədər insanı qəbul edə bilər. ​Hazırda bu parkda böyük yaşıl sahəyə yönəlmiş şəhərsalma inkişafı üzrə dövlət-özəl tərəfdaşlığı davam edir. Bura biomüxtəlifliyə töhfə verən parklar və özəl sahələr boyu inteqrasiya olunmuş yaşıllıqlar, eləcə də istixana qazlarının azaldılmasına kömək edən çoxfunksiyalı binalarda mərkəzləşdirilmiş isitmə və soyutma sistemlərinin tətbiqi daxildir. Bu səylər həm Yaponiyada, həm də xaricdə yüksək qiymətləndirilib".