MİDA mənzillərinin satışına qanunsuz müdaxilə cəhdi ilə bağlı cinayət işi açılıb

Dövlət Təhlükəsizliyi Xidməti, Xüsusi Rabitə və İnformasiya Təhlükəsizliyi Dövlət Xidməti və Mənzil İnşaatı Dövlət Agentliyinin yaydığı birgə məlumata görə, 2025-ci il 3 dekabr tarixində Mənzil İnşaatı Dövlət Agentliyinin (MİDA) növbəti layihələri üzrə ümumilikdə 627 mənzilin “Elektron hökumət” portalı (www.e-gov.az) üzərindən “Güzəştli mənzil” sistemi vasitəsilə satışı zamanı qanunsuz müdaxilələr qeydə alınmış və bununla bağlı cinayət işi başlanmışdır.

Güzəştli mənzillərin qiyməti bazar qiymətindən xeyli aşağı olduğundan onlara tələbat çox böyükdür. Satış prosesi elektron qaydada müraciət növbəliliyi əsasında həyata keçirilir. Başladığı andan bir neçə saniyə ərzində sona çatan satış prosesində uğur qazanmaq müraciət edənin informasiya texnologiyaları sahəsində vərdişlərindən xeyli asılı olur. Bir çox şəxslər isə elektron sistemlərə qanunsuz müdaxilə etməklə bağlı “xidmətlər” təklif edərək möhtəkirliklə məşğul olurlar.

Hər bir halda, qanunsuz müdaxilə cəhdlərinin olub-olmamasından asılı olmayaraq, güzəştli mənzil əldə etmə şansını müraciət edənin kompüterdən istifadə bacarığından asılı vəziyyətə salmaq effektiv yanaşma deyil və narazılığa səbəb olur. Bu sahədə, məsələn, Türkiyədə tətbiq olunan analoji TOKİ təcrübəsində olduğu kimi, televiziya ilə yayımlanan ənənəvi püşkatma mexanizminin tətbiqi nəzərdən keçirilə bilər.

The Daily Baku redaksiyası