Mətin Məmmədli: Xartiya iki ölkə arasında daimi dialoq və konkret mexanizmlər formalaşdıracaq

ABŞ və Azərbaycan arasında imzalanmış Strateji Tərəfdaşlıq Xartiyası ilk növbədə iki ölkə münasibətlərinin daha yüksək və uzunmüddətli səviyyəyə yüksəldiyini təsdiq edir. Bu sənəd eyni zamanda tərəflər arasında əməkdaşlığın institusional çərçivəsini müəyyən edir və daimi dialoq mexanizminin formalaşdırılması baxımından mühüm əhəmiyyət daşıyır.

Bunu "The Daily Baku" - ya Beynəlxalq Münasibətlərin Təhlili Mərkəzinin şöbə müdiri Mətin Məmmədli deyib.

Mətin Məmmədli qeyd edib ki, Xartiyanın önəmi yalnız siyasi bəyanat xarakteri daşıması ilə məhdudlaşmır. Sənəd iki ölkə arasında münasibətlərin əsas istiqamətlərini və prinsiplərini sistemli şəkildə müəyyənləşdirir. Xartiyanın məzmununa diqqət yetirdikdə görünür ki, burada kifayət qədər mühüm və strateji əhəmiyyətli sahələr əks olunub.

Onun sözlərinə görə, ABŞ–Azərbaycan münasibətlərinin ənənəvi istiqamətləri olan müdafiə, təhlükəsizlik, enerji, ticarət və iqtisadi əməkdaşlıq sənəddə öz əksini tapmaqla yanaşı, yeni prioritet sahələr də müəyyən edilib. Bu baxımdan rəqəmsal infrastruktur, süni intellekt, regional bağlantılar və Orta Dəhliz kimi istiqamətlərin ayrıca vurğulanması xüsusi diqqət çəkir.

Mətin Məmmədli bildirib ki, Strateji Tərəfdaşlıq Xartiyası daha çox ümumi və konseptual xarakter daşıyan, tərəflərin hansı istiqamətlərdə əməkdaşlıq edəcəyini müəyyən edən niyyət sənədidir. Bununla belə, sənədin mühüm xüsusiyyətlərindən biri ondan ibarətdir ki, qarşıdakı üç ay ərzində konkret istiqamətlər üzrə yol xəritələrinin hazırlanması və işçi qruplarının yaradılması nəzərdə tutulur.

BMTM rəsmisinin sözlərinə görə, bu müddəa göstərir ki, həm rəqəmsal infrastruktur, həm də hər iki ölkə üçün strateji əhəmiyyət kəsb edən Orta Dəhlizlə bağlı konkret planlar hazırlanacaq və həmin istiqamətlər üzrə daha effektiv mexanizmlər müəyyən ediləcək. Yəni, praktiki icra mexanizmlərinin formalaşdırılması mərhələsi yaxın aylarda reallaşacaq.

Mətin Məmmədli hesab edir ki, qarşıdakı dövrdə yol xəritələrinin hazırlanması və konkret mexanizmlərin müəyyənləşdirilməsi iki ölkə arasında əməkdaşlığın real nəticələr verməsinə şərait yaradacaq. Bu isə münasibətlərin təkcə siyasi bəyanatlar səviyyəsində deyil, praktiki müstəvidə də dərinləşməsinə töhfə verəcək.

Şöbə müdiri vurğulayıb ki, bütövlükdə Strateji Tərəfdaşlıq Xartiyasının imzalanması və onun icrası istiqamətində atılacaq addımlar Azərbaycan–ABŞ münasibətlərinin daha da möhkəmlənməsinə, institusional əsaslarının güclənməsinə və uzunmüddətli strateji əməkdaşlığın formalaşmasına xidmət edəcək.