Lindsi Nili Kanadadakı mənzil böhranının miqyasına diqqət çəkib

Kanadada əlçatan mənzil problemini həll etmək üçün 1 trilyon ABŞ dolları vəsait lazımdır.

Bunu Kanada İpoteka və Mənzil Korporasiyasının (CHMC) siyasət üzrə vitse-prezidenti Lindsi Nili Ümumdünya Şəhərsalma Forumunun 13-cü sessiyası (WUF13) çərçivəsində keçirilən Biznes Dəyirimi Masasında deyib.

L. Nili ipoteka krediti sığortası və sekuritizasiya proqramlarının ev sahibliyinə çıxışı təmin etməkdə mühüm rol oynadığını bildirib: "Xüsusilə ipoteka krediti sığortası özəl investisiyalara yol açmaq üçün mühüm bir riskazaltma vasitəsi rolunu oynayır. Belə ki, CMHC sığortaçı qismində zərərlərə qarşı tam təminat verir. Bu isə borcverənlərə potensial ev alıcılarına, çoxmənzilli yaşayış binalarının tikintisi ilə məşğul olan tərtibatçılara ipoteka kreditləri təqdim etməyə və ümumilikdə borclanma xərclərinin azaldılmasına kömək edir".

Təşkilat rəsmisi Kanadanın qarşılaşdığı mənzil əlçatanlığı böhranının miqyasını rəqəmlərlə diqqətə çatdırıb: "Bu boşluğu doldurmaq üçün kifayət qədər dövlət vəsaiti sadəcə olaraq yoxdur. Hesablamalarımıza görə, Kanadada bu rəqəm təxminən 1 trilyon dollara yaxındır. Ölkədə mənzil əlçatanlığını bərpa etmək üçün 2035-ci ilə qədər hər il 430 min ilə 480 min arasında yeni mənzil vahidinin tikilməsi tələb olunur. İnvestorlar və inşaatçılar üçün müəyyənlik, proqnozlaşdırıla bilən mühit lazımdır. Özəl kapitalın mənzil sektoruna cəlb edilməsi sabit bazar şərtləri və layihələrin həyata keçirilə biləcəyinə, həmçinin uzunmüddətli perspektivdə səmərəli olacağına dair inam tələb edir".