İtaliyanın Tehrandakı səfiri Paola Amadei İran Xarici İşlər Nazirliyinə çağırılıb.
"The Daily Baku" xəbər verir ki, bu barədə İran KİV məlumat yayıb.
Buna səbəb İtaliyanın xarici işlər naziri Antonio Tacaninin İran İnqilab Keşikçiləri Qvardiyasının (Sepah) terrorçu təşkilatlar siyahısına daxil edilməsi ilə bağlı açıqlamasıdır.
İran XİN-in Qərbi Avropa İdarəsinin rəisi Əlirza Yusifi görüş zamanı İtaliya xarici işlər nazirinin mövqeyini "məsuliyyətsiz" adlandırıb.
O, Sepahın İran Silahlı Qüvvələrinin tərkib hissəsi olduğunu deyərək quruma qarşı cəhdlərin təhlükəli nəticələr doğuracağı ilə bağlı xəbərdarlıq edib.
İran tərəfi İtaliya hökumətini Tehrana qarşı "düşünülməmiş yanaşmanı" dəyişməyə çağırıb. Rəsmi Tehran Sepahın terror təşkilatı kimi tanınması təşəbbüslərini qəbuledilməz hesab etdiyini bir daha vurğulayıb.
Yanvarın 26-da İtaliyanın xarici işlər naziri Antonio Tacani ölkəsinin Sepahın terror təşkilatı kimi tanınması məsələsini Avropa İttifaqı səviyyəsində gündəmə gətirməyi planlaşdırdığını açıqlamışdı.
© 2026 The Daily Baku. Bütün hüquqlar qorunur.