İsrailli politoloq: Azərbaycan Cənubi Qafqazda sabitliyi iqtisadi maraqlar üzərindən qurur

Azərbaycanın eyni vaxtda ABŞ və İsraillə tərəfdaşlığını dərinləşdirməsi ölkənin regional mövqelərini açıq şəkildə gücləndirir və bu, indiki beynəlxalq reallıqlar fonunda tamamilə təbii prosesdir.

Bu fikirləri "The Daily Baku" - ya açıqlamasında israilli politoloq Yuri Boçarov bildirib.

Onun sözlərinə görə, Azərbaycanın həyata keçirdiyi çoxvektorlu siyasətin əsas üstünlüyü ondadır ki, bu xətt regionu qarşıdurma məkanına çevirmək yox, onu real iqtisadi və texnoloji əməkdaşlıq platforması kimi formalaşdırmaq məqsədi daşıyır.

"ABŞ və İsraillə paralel qurulan strateji əlaqələr Bakının Cənubi Qafqazda balanslaşdırıcı və birləşdirici rolunu daha da gücləndirir. ABŞ–Azərbaycan Strateji Tərəfdaşlıq Xartiyası təkcə siyasi sənəd deyil, eyni zamanda texnologiya, iqtisadiyyat, təhlükəsizlik və süni intellekt sahələrində əməkdaşlığı uzunmüddətli və institusional çərçivəyə salan mexanizmdir. Bu yanaşma münasibətləri cari siyasi gündəmdən çıxarıb strateji inkişaf müstəvisinə keçirir", o deyib.

Politoloq diqqətə çatdırır ki, Azərbaycan və İsrail arasında süni intellekt və yüksək texnologiyalar sahəsində qurulan əməkdaşlıq  məhz bu məntiqə əsaslanır: " Burada söhbət təkcə ayrı-ayrı layihələrdən yox, rəqəmsal infrastrukturun inkişafı, mütəxəssis hazırlığı, tətbiqi texnoloji həllər və innovasiya mühitinin formalaşdırılmasından gedir. Bu əməkdaşlıq real iqtisadi nəticələr yaradır və qarşılıqlı maraqları dərinləşdirir. Bu cür sistemli texnoloji və iqtisadi əməkdaşlıq yeni iş yerlərinin açılmasına, investisiyaların artmasına və tranzit imkanlarının genişlənməsinə şərait yaradır. Nəticədə regionda sabitliyin qorunmasında maraqlı olan tərəflərin sayı artır və sülh təkcə siyasi çağırış deyil, iqtisadi zərurətə çevrilir."

Yuri Boçarov hesab edir ki, Cənubi Qafqaz geniş tranzit və texnoloji arxitekturanın bir hissəsinə çevrildikcə, burada sabitliyin qiyməti yüksəlir. Çünki artıq söhbət təkcə siyasi mövqelərdən yox, uzunmüddətli investisiyalardan, texnologiyalardan və iqtisadi maraqlardan gedir. Bu da regionun davamlı inkişafına xidmət edən mühüm amildir.

Politoloqun fikrincə, Azərbaycanın regional statusunun yüksəlməsi təbii olaraq diqqəti artırır. Lakin əsas məsələ ondan ibarətdir ki, Azərbaycan bu prosesi kiməsə qarşı alətə çevirmir, əksinə, onu öz milli maraqları və uzunmüddətli inkişaf strategiyası çərçivəsində qurur. Məhz bu yanaşma Azərbaycanın siyasətini daha dayanıqlı edir.

Yuri Boçarov sonda vurğulayıb ki, Prezident İlham Əliyevin yürütdüyü xətt milli maraqlara əsaslanan, uzaq perspektivi nəzərə alan siyasətdir. Xaricdən gələn müxtəlif reaksiyalar  istər dəstək, istərsə də narahatlıq  bu kontekstdə ikinci dərəcəli məsələdir. Politoloqun sözlərinə görə, “əgər layihənin arxasında real fayda, institusional mexanizm və siyasi iradə varsa, o yoluna davam edir”.