İranın prezidenti Məsud Pezeşkianın dünən – 07 mart 2026-cı ildə Müvəqqəti Rəhbərlik Şurasının qonşu dövlətlərə hücumların dayandırılması barədə silahlı qüvvələrə əmr verməsini bildirməsindən və indiyə qədərki hücumlara görə üzr istəməsindən sonra belə İran qonşu dövlətlərə hücumlarını davam etdirir. Xatırladaq ki, İranın dini rəhbərinin öldürülməsindən sonra yeni rəhbər seçilənədək dövlət başçısının səlahiyyətlərini tərkibinə prezident, məhkəmə hakimiyyətinin rəhbəri və bir üləmanın daxil olduğu Müvəqqəti Rəhbərlik Şurası icra edir.
Məsud Pezeşkianın dünən səhər saatlarında yaydığı video müraciətdən sonra, mühafizəkar dairələr onu tənqid ediblər.
Az sonra Təhlükəsizlik Şurasının katibi, mərhum ali dini rəhbər Əli Xameneinin özünə müvəqqəti varis təyin etdiyi və ölkəyə faktiki olaraq, siyasi rəhbərlik etdiyi bildirən Əli Laricaninin geniş müsahibəsi yayılmışdır. Laricani müsahibəsində İranın ABŞ və İsrailə müqavimətinin davam edəcəyini bildirmişdir. O, həmçinin Azərbaycanla bağlı mövqeyini bildirmişdir. Mövzunun əhəmiyyətini nəzərə alaraq, müsahibənin həmin hissəsini olduğu kimi təqdim edirik
“Məsələn, əgər Azərbaycan kimi ölkələrdən birində bir dron gedib harasa zərbə endiribsə, bunun bizimlə heç bir əlaqəsi yoxdur. Biz bunu onlara demişik, sizə də deyirik - bunu biz etməmişik. Düşünürəm ki, bu məsələdə İsrail müəyyən təxribatlar edir və bəzi ölkələri bizimlə qarşıdurmaya cəlb etmək istəyir. Bizim bununla heç bir işimiz yoxdur - ümumiyyətlə Azərbaycanın bizimlə nə işi var axı? Əlbəttə, əgər həmin ölkələrdən bəziləri bizə qarşı təxribat etsələr və uçuşlar həyata keçirsələr, biz onlarla qarşılıq verəcəyik”.
Bununla demək olar ki, eyni vaxtda İranın dövlət teleradio şirkətinin (IRIB) teleqram kanalında, İranın Silahlı Qüvvələrinin Birləşmiş Əməliyyat Komandanlığının (“Əl-Ənbiyyə Mərkəzi Qərargahı”) Azərbaycana münasibətdə təhdidlə dolu aşağıdakı bəyanatı yayılmışdır:
“İran İslam Respublikasının silahlı qüvvələri bölgədə amerikalı və sionist təcavüzkarlarla genişmiqyaslı döyüşlərə baxmayaraq, bütün səylərini göstərərək dost, qonşu və müsəlman ölkələrin milli təhlükəsizliyi və maraqlarına zərər dəyməməsinə çalışmışdır.
İranın qonşu ölkəsi olan Azərbaycan Respublikasına, müsəlman ölkəsi kimi bildiririk ki, bölgədə təhlükəsizliyin genişlənməsinin qarşısını almaq üçün sionistləri həmin ölkədən çıxarsınlar və öz xalqlarının və İran İslam Respublikasının təhlükəsizliyini təhlükə altına atmasınlar.”
Birləşmiş Əməliyyat Komandanlığının (“Əl-Ənbiyyə Mərkəzi Qərargahı”) İranın iki növ silahlı qüvvəsi - İnqiliab Keşikçiləri Korpusu və ənənəvi Ordunun (“Arteş”) müharibə dövründə əməliyyatlarını idarə edən vahid qərargahdır. İranın döyüş əməliyyatlarını hazırda bu qərargah idarə edir. Bu komandanlığın rəisləri İnqiliab Keşikçiləri Korpusunun nümayəndələri olur. Komandanlığın Azərbaycanla bağlı 07 mart 2026-cı il tarixli bəyanatı sübut edir ki, İranın döyüş komandanlığı Azərbaycanı hədəflər sırasında görür. Bu, faktiki olaraq, Naxçıvana 5 mart 2026-cı il tarixində baş vermiş hücumun məhz İran tərəfindən edilməsinin təsdiqidir.
Dünən baş verən hadisələrin təhlili göstərir ki, İranda faktiki hakimiyyət İnqiliab Keşikçiləri Korpusunun əlindədir. Onlar ölkənin siyasi qüvvələrinin eskalasiyanın qarşısını almaq cəhdlərinə məhəl qoymurlar və qonşu dövlətlərə hücumlarını dayandırmaq niyyətində deyillər.
The Daily Baku redaksiyası
© 2026 The Daily Baku. Bütün hüquqlar qorunur.