Bu gün səhər saatlarından etibarən ABŞ və İsrail İrana qarşı genişmiqyaslı hücuma başlayıb. Bu günkü zərbədə İranın siyasi və hərbi rəhbərliyi, komanda mərkəzləri, ballistik raket qurğuları, enerji və rabitə qovşaqları hədəf alınmışdı.
ABŞ-ın bəyan etdiyi məqsəd hazırkı rəhbərliyi sıradan çıxarmaqla İranda hakimiyyət dəyişikliyinə nail olmaq, eyni zamanda ölkədə güclü mərkəzi hakimiyyəti qoruyub saxlamaqdır. Bu, müəyyən mərhələdə İran əhalisinin kütləvi etirazlara sövq edilməsini və ABŞ-ın İranın təhlükəsizlik isteblişmentində müəyyən qüvvələrlə sövdələşmə əldə etməsini nəzərdə tutur. Bir çox ekspertlər hesab edir ki, ABŞ Venesueladan sonra İranı nəzarət altına almaqla Çinin enerji mənbələrinə çıxışını daha da məhdudlaşdırmaq və bununla da ABŞ-a əsas rəqib olan bu ölkənin iqtisadi inkişafını yavaşıtmaq istəyir.
İsrail hərbi hava qüvvələri İrana hücum üçün Suriya, İordaniya və İraqın hava məkanından sərbəst şəkildə istifadə edir. Suriya və İraqın hava hücumundan müdafiə sistemləri olmadığı və ya zəif olduğu üçün yəqin ki, bu dövlətlərin razılığını soruşmayıblar. İordaniya isə öz hava məkanından istifadə edilməsi üçün, yəqin ki, konfidensial şəkildə razılıq verib.
İran hökuməti ABŞ və İsrailini hücumunu pisləyib və müqavimət göstərəcəyini bildirib. İran silahlı qüvvələri cavab zərbələri endirməyə başlayıb. İran İsrailə və ABŞ-ın Qətər, Səudiyyə Ərəbistanı və Bəhreyndəki hərbi obyektlərinə raket və pilotsuz uçuş aparatları ilə zərbələr endirir.
Diqqəti çəkən digər məqam İran hökumətinin Tehran əhalisini şəhərdən çıxmağa çağırmasıdır. Yəqin ki, hökumət əhalini paytaxtdan çıxarmaqla kütləvi iğtişaş ehtimalını azaltmaq istəyir.
Böyük Britaniya İrana qarşı hücum əməliyyatına qoşulmasa da, onun hərbi qüvvələri İranın İsrailə qarşı raket hücumunun dəf edilməsində iştirak edir.
İranın hərbi taktikası ABŞ və İsraildən fərqlidir. İran ilk günlərdə qarşı tərəfin hava hücumundan müdafiə sisteminin potensialını tükətmək üçün nisbətən köhnə nəsil raketlərdən və ucuz PUA-lardan istifadə etməyə üstünlük verir, nisbətən müasir raketlərini isə sonrakı mərhələyə saxlayır. ABŞ və İsrail isə ilk günlərdən güclü zərbə ilə İranın siyasi-hərbi rəhbərliyini, komanda və nəzarət sistemini sıradan çıxarmağı hədəfləyir.
Hazırda əsas sual ilk zərbə dalğasında İrana dəymiş zərərin nədən ibarət olması və ölkə rəhbərliyinin bu zərbələrdən salamat qurtarıb-qurtarmamasıdır.
Hər bir halda, İranın ötən ilin iyununda baş vermiş müharibədən sonra müharibəyə ardıcıl şəkildə hazırlaşmasını, Çin və Rusiyanın hərbi yardımlarını əldə etməsini nəzərə alsaq, hazırkı müharibənin iyundakı müharibədən daha intensiv və dağıdıcı olacağını gözləmək olar.
The Daily Baku redaksiyası
© 2026 The Daily Baku. Bütün hüquqlar qorunur.