İordaniyada keçirilən Kibertəhlükəsizlik Müsabiqəsində qalib gələn azərbaycanlı mütəxəssislər: Nəticələrimiz, iştirakçılar və münsiflər heyəti tərəfindən heyrətlə qarşılandı

The Daily Baku redaksiyası ötən il noyabrın 20-də İordaniyada keçirilən kibertəhlükəsizlik və tətbiqi kriptoqrafiya sahəsində ARMYTHON beynəlxalq kibertəhlükəsizlik müsabiqəsində 2-ci yerə layiq görülmüş Dövlət Təhlükəsizliyi Xidmətinin (DTX) Milli Kibertəhlükəsizlik Mərkəzinin “Land of Fire” komandasının mütəxəssislərindən müsahibə alıb. Müsahibəni təqdim edirik.

– ARMYTHON 2025 müsabiqəsinin mahiyyətindən danışardınız? Bu yarışmanın əsas məqsədi nədir, hansı sahələr üzrə tapşırıqlar verilir və digər kibertəhlükəsizlik müsabiqələrindən nə ilə fərqlənir?

– Armython - İordaniya Haşimi Krallığının himayəsi altında, qlobal miqyasda təhlükəsizlik orqanları və silahlı qüvvələrin kibertəhlükəsizlik bölmələri üçün təşkil edilən ən nüfuzlu platformalardan biridir. Bu platformanın əsas missiyası strateji dövlət infrastrukturlarının kiberdayanıqlığını artırmaq, müdafiə sistemlərini potensial təhdidlərə qarşı sınaqdan keçirmək və beynəlxalq təcrübə mübadiləsini təmin etməkdir.

2025-ci ilin noyabr ayında keçirilən Armython 2025 müsabiqəsi öz coğrafi genişliyi ilə seçilirdi. Yarışmada Yaxın Şərq, Asiya, Avropa, Qafqaz və Mərkəzi Asiya regionlarını təmsil edən 28 ölkədən 37 ən güclü komanda mübarizə apardı.

Müsabiqənin texniki ssenariləri klassik Capture The Flag (CTF)yarışlarından köklü surətdə fərqlənərək, tamamilə real infrastruktur mühitinə inteqrasiya olunmuş kiber həllər, kritik sistemlərin dayanıqlığının təmin edilməsi və mürəkkəb insidentlərin texniki aradan qaldırılması prinsipləri üzərində qurulmuşdu. Tapşırıqlar süni simulyasiyalardan uzaq olub, birbaşa real iş mühitində tətbiq edilən operativ müdaxilə və kiber-mühəndislik həlləri xarakteri daşıyırdı.

MİLLİ KİBERTƏHLÜKƏSİZLİK MƏRKƏZİ-nin "Land of Fire"komandasının mütəxəssisləri.

Əsas istiqamətlər:

Mürəkkəb zərərli proqram təminatlarının (Malware) analizi;

Rəqəmsal Kriminalistika (Digital Forensics): İnsidentlərin tədqiqi, itirilmiş məlumatların bərpası və loq arxivlərinin dərin analizi;

Kritik infrastrukturun və daxili şəbəkələrin müdafiə və hücum ssenariləri;

Kiberkəşfiyyat (OSINT) və əks-kəşfiyyat metodologiyaları;

Qırmızı Komanda (Red Teaming) əməliyyatları: Real hücum ssenarilərinin simulyasiyası;

Pilotsuz Uçuş Aparatlarının (PUA) kiber-müdafiəsi: Dronların proqram təminatına müdaxilə, uçuşun məsafədən dayandırılması və telemetrik loqların təhlili.

– Komanda müsabiqəyə necə hazırlaşdı və müsabiqə öncəsi hansı yanaşmalar uğura təsir etdi? Hazırlıq prosesində hansı praktik məşqlər, öyrənmə metodları tətbiq etdiniz? Çətin tapşırıqlar üçün hansı sahələrə daha çoxdiqqət ayırdınız? Azərbaycan komandasının “first blood” nəticəsindən bəhs edərdiniz.

– Komandamızın bu mötəbər yarışmadakı uğurunun təməlində xüsusi təlimlərdən ziyadə, gündəlik iş fəaliyyətimizdə qarşılaşdığımız mürəkkəb kiber-insidentlərin həlli zamanı qazandığımız zəngin təcrübə dayanırdı. Müsabiqə tapşırıqları real iş mühitinə maksimum

yaxınlaşdırıldığı üçün komanda üzvlərimiz yüksək adaptasiya qabiliyyəti nümayiş etdirərək tapşırıqları operativ şəkildə icra etdilər.

Mürəkkəb və çoxşaxəli tapşırıqların həllində əsas strategiyamız kollektiv intellekt prinsipinə əsaslanırdı. Xüsusilə yüksək analitik təfəkkür tələb edən iki kritik tapşırığın həlli zamanı komanda daxilində fikir mübadiləsi apararaq, ən optimal həll yolunu tapmağa nail olduq.

Land of Fire (Odlar Yurdu) komandası olaraq, yarışma ərzində nümayiş etdirdiyimiz sürət - yəni First Blood (tapşırığı ilk həll edən komanda) nəticələrimiz, iştirakçılar və münsiflər heyəti tərəfindən heyrətlə qarşılandı. Azərbaycan bayrağının və ölkəmizin adının möhtəşəm səs effektləri müşayiəti ilə nəhəng monitorlarda dəfələrlə əks olunması hər birimiz üçün sonsuz qürur mənbəyi idi. Yarışın ikinci mərhələsində göstərdiyimiz qeyri-adi sürət və effektivlik

təşkilatçıların diqqətini o dərəcədə cəlb etdi ki, fəaliyyətimizin şəffaflığını və metodologiyamızı daha yaxından izləmək məqsədilə kompüterlərimizə əlavə texniki nəzarətçilər təhkim olundu.

– Bu uğurun sirri nədir və gələcək uğurlar üçün nə tövsiyə edərdiniz? “Land of Fire” komandası olaraq 2-ci yerə yüksəlmənizi nə ilə əlaqələndirirsiniz? Komanda ruhu,strategiya, texniki bacarıqlar, və başqa hansı amillər bu nəticəyə gətirdi?

– Komandamızın 37 peşəkar komanda arasında 2-ci yerə yüksəlməsi bir çox xarici tərəfdaşlar və təşkilatçı ölkə üçün böyük maraqla qarşılanan bir nəticə oldu. Hətta turnirin qalibi olan komandanın üzvləri və beynəlxalq ekspertlər Azərbaycanı təmsil edən mütəxəssislərin bu dərəcədə yüksək peşəkarlıq və texniki hazırlıq nümayiş etdirməsini xüsusi qeyd etdilər.

Bu nailiyyəti biz aşağıdakı amillərin vəhdəti kimi qiymətləndiririk:

Fərdi inkişaf: Komanda üzvlərimizin qlobal CTF platformalarında mütəmadi olaraq öz biliklərini təkmilləşdirməsi;

Mənəvi dəstək: Rəhbərliyin bizə göstərdiyi etimad və yaratdığı yüksək ruh yüksəkliyi.

Bu qələbə bizim üçün son deyil, sadəcə bir başlanğıcdır. Məqsədimiz gələcək beynəlxalq platformalarda daha da yüksək nəticələr əldə edərək, Azərbaycanın kiber-müdafiə potensialını və intellektual gücünü dünya miqyasında layiqincə təmsil etməkdir.

İordaniyada keçirilən Kibertəhlükəsizlik Müsabiqəsində qalib gələn azərbaycanlı mütəxəssislər: Nəticələrimiz, iştirakçılar və münsiflər heyəti tərəfindən heyrətlə qarşılandı - MÜSAHİBƏ