Hindistan ilk dəfə Bakıda Mango Festivalı keçirdi

Hindistanın Azərbaycandakı səfirliyi Bakıda ilk dəfə "Böyük Hindistan Manqo Festivalı" təşkil edib. Tədbir həm Hindistanın məşhur manqo növlərini tanıtmaq, həm də iki ölkə arasında mədəni və iqtisadi əlaqələri gücləndirmək məqsədi daşıyıb.

Festival diplomatik korpusun nümayəndələrini, dövlət rəsmilərini, iş adamlarını, media təmsilçilərini, Hindistan diasporunu və çoxsaylı Azərbaycan vətəndaşlarını bir araya gətirib. Ziyarətçilər dünyaca məşhur Alphonso, Kesar və Badami daxil olmaqla müxtəlif Hindistan manqolarını dadmaq imkanı əldə ediblər.

Hindistanın Azərbaycandakı səfiri Abhay Kumar bildirib ki, festival ölkələr arasında mədəni və insanlararası əlaqələrin möhkəmləndirilməsi istiqamətində növbəti addımdır.

Onun sözlərinə görə, Hindistan dünyada ən böyük manqo istehsalçısıdır və ölkədə yüzlərlə fərqli manqo növü yetişdirilir. Səfir hesab edir ki, Azərbaycan istehlakçıları da bu meyvənin müxtəlif dadını və keyfiyyətini yüksək qiymətləndirəcəklər.

Festival iştirakçılarının əksəriyyəti Hindistan manqosunu ilk dəfə dadıb. Bir çox ziyarətçi meyvənin dadını və ətrini yüksək qiymətləndirərək onun Azərbaycan bazarında daha geniş satışa çıxarılmasını arzuladı.

Azərbaycanın hotel və restoran sektorunun nümayəndələri də təşəbbüsü müsbət qiymətləndiriblər. Onların sözlərinə görə, yay mövsümündə xarici turistlər, xüsusilə də Hindistandan gələn qonaqlar tərəfindən təzə manqo və manqo əsasında hazırlanan məhsullara tələbat artır.

Səfirlik hesab edir ki, iki ölkə arasında birbaşa aviareyslərin mövcudluğu, turizmin inkişafı və artan istehlakçı marağı Hindistan manqolarının Azərbaycan bazarında möhkəmlənməsi üçün əlverişli şərait yaradır.