Gela Vasadze: Xocalı təkcə Azərbaycanın deyil, bütün regionun yaddaşıdır

Xocalı soyqırımı son dərəcə ağır və ağrılı mövzudur. Bu barədə danışarkən emosional yanaşma ilə siyasi-hüquqi yanaşmanı bir-birindən ayırmaq vacibdir. Siyasi aspektdən baxdıqda, Xocalı faciəsi Sovet İttifaqının dağılmasından sonra postsovet məkanında mülki əhaliyə qarşı törədilmiş ilk kütləvi qırğın kimi tarixə düşüb.

Bunu "The Daily Baku "ya açıqlamasında gürcüstanlı politoloq Gela Vasadze deyib.

" Doğrudur, bundan əvvəl Tbilisidə, Bakıda, Vilnüsdə də faciəli hadisələr baş verib. Sovet İttifaqı öz mövcudluğu dövründə çoxsaylı ağır cinayətlər törədib. Lakin bunlar hüquqi baxımdan Sovet dövlətinin məsuliyyəti idi. Xocalı isə artıq tamamilə yeni geosiyasi mərhələdə Sovet İttifaqı dağıldıqdan sonra baş vermiş ilk kütləvi mülki qətliam idi", deyə Vasadze bildirib.

O qeyd edib ki bu, eyni zamanda, başqa bir mühüm məqamı da göstərir: Xocalı faciəsi münaqişələr zamanı mülki əhalinin hədəfə alınmasının təhlükəli presedentini yaratdı. "Təəssüf ki, həmin presedent sonradan da davam etdi. Elə 1992-ci ildə Qaqra hadisələri, 1993-cü ildə Suxumi faciəsi, daha sonra isə postsovet məkanının müxtəlif nöqtələrində baş verən oxşar cinayətlər bunu sübut etdi.

Bu baxımdan Xocalı təkcə Azərbaycan üçün deyil, ən azı Cənubi Qafqaz regionu və artıq tarixə çevrilmiş posts

ovet məkanı üçün dərs olmalı idi." Politoloq vurğulayıb ki, əgər Xocalıya beynəlxalq səviyyədə vaxtında və adekvat reaksiya verilsəydi, bu gün dünyada, xüsusilə də Ukraynada yaşadığımız dəhşətli humanitar fəlakətlərin qarşısını almaq mümkün olardı." "Xocalıya səssizlik sonradan cəzasızlıq hissini gücləndirdi və bu da daha böyük faciələrə yol açdı.

Bu, hər kəs üçün çox ciddi dərsdir. Mənəvi tərəfi isə ayrıca izaha ehtiyac duymur, burada hər şey aydındır. O dəhşətli gecədə günahsız şəkildə qətlə yetirilmiş insanların xatirəsi daim hörmətlə anılmalıdır. Onların xatirəsi qarşısında baş əyirəm."