Fərid Şəfiyev: Azərbaycan Mərkəzi Asiyanı Avropa və qlobal bazarlarla birləşdirən əsas qapı rolunu oynayır

“Azərbaycan Mərkəzi Asiyanı Avropa və qlobal bazarlarla birləşdirən əsas qapı rolunu oynayır. Azərbaycanın Mərkəzi Asiya Dövlət Başçılarının Məşvərət Görüşünə qəbul edilməsi mühüm dönüş nöqtəsidir. İlk dəfə olaraq Cənubi Qafqazdan olan bir ölkə əvvəllər yalnız Mərkəzi Asiya dövlətlərini əhatə edən bir çərçivəyə tamhüquqlu üzv olub. Bu addım Azərbaycanın regional arxitekturadakı rolunu gücləndirir və strukturlaşdırılmış əməkdaşlıq üçün yeni imkanlar açır”.

Bu barədə Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev Körfəz Tədqiqatlar Mərkəzinin (Gulf Research Center) Özbəkistan Respublikası Prezidenti yanında Strateji və Regional Tədqiqatlar İnstitutunun tərəfdaşlığı ilə keçirilən “Körfəz-Mərkəzi Asiya Beyin Mərkəzlərin Onlayn Forumundakı çıxışı zamanı bidirib.

BMTM sədrinin sözlərinə görə, “Beynəlxalq Sülh və Rifah naminə Tramp Marşrutu” (TRIPP), digər adı ilə Zəngəzur dəhlizi kimi təşəbbüslər region üzrə əlavə bağlantılar yaradaraq Şərq-Qərb əlaqələrinin dayanıqlığını və şaxələndirilməsini daha da gücləndirə bilər.

“Əlaqəlilik (connectivity) C6 gündəliyinin əsas sütunlarından biri olaraq qalır. Bura infrastrukturun inkişafı, rəqəmsallaşma və mövcud maneələrin aradan qaldırılması daxildir. Prezident İlham Əliyevin qeyd etdiyi kimi, Mərkəzi Asiya və Azərbaycan artıq “vahid geosiyasi və geoiqtisadi region”u təşkil edir. Bu fikir yalnız siyasi baxışı deyil, həm də formalaşmaqda olan logistik və iqtisadi reallığı əks etdirir.

Formatın xarici aspekti Azərbaycanın bu prosesdə iştirakı ilə daha da güclənir. C6 ölkələri indi Avropa İttifaqı, ABŞ, Türkiyə, Çin və Avrasiyada əlaqəlilik təşəbbüslərində iştirak edən digər mühüm beynəlxalq tərəfdaşlarla daha güclü şəkildə əməkdaşlıq etmək imkanına malikdir.

Gələcəyə baxdıqda, C6+1 formatı anlayışı getdikcə daha çox aktuallıq qazanır. Belə çərçivə bütün iştirakçılar üçün qarşılıqlı faydalar yarada bilər.

Mərkəzi Asiya üçün bu, diplomatik dialoqu fiziki infrastrukturla daha sıx əlaqələndirməyə, ixrac marşrutlarının şaxələndirilməsini dəstəkləməyə və məhdud tranzit imkanlarından asılılığı azaltmağa kömək edəcək”,-deyə F.Şəfiyev qeyd edib.