Ermənistanda kilsə ilə hökümət arasında növbəti gərginlik: Katolikos II Qaregini nə gözləyir?

Ermənistanda hökumətlə Erməni Apostol Kilsəsinin rəhbəri II Qaregin arasında yaranmış gərginlik artıq açıq qarşıdurmaya çevrilib.

Ermənistan hökumətinin Qareginə münasibəti kifayət qədər sərt və qətidir. Hakimiyyət onu sadəcə dini lider kimi yox, siyasi proseslərə müdaxilə edən fiqur kimi görür və bu səbəbdən onun mövqeyini qəbul etmir. Kilsədən aşkar edilən silah sursat da əslində bu mövqeyin boşuna olmadığını nümayiş etdirir.

Hazırkı vəziyyət göstərir ki, hökumət daxilində II Qareginin vəzifədən uzaqlaşdırılmasına ciddi müqavimət yoxdur. Əksinə, Paşinyanın komandası kilsənin siyasi təsirini zəiflətmək və bu məsələni seçkilərə qədər bağlamaq istəyir və Qareginə qarşı açıq və kəskin xətt seçilib.

Kilsə daxilində də vəziyyət əslində Qareginin xeyrinə deyil. Onu dəstəkləməyən, hətta getməsini istəyən ruhanilərin olması katolikosun mövqeyini zəiflədir. Bu da hökumətin əlini daha da gücləndirir və qarşıdurmada üstün tərəfin dövlət olduğunu açıq şəkildə ortaya qoyur.

Qareginin əsas ümidi parlament seçkilərinədir. O, seçkilərdən sonra siyasi mənzərənin dəyişəcəyinə və bu yolla mövqeyini qoruyacağına inanır. Amma proseslərin gedişi göstərir ki, hökumət bu qarşıdurmanı iyuna qədər uzatmaq niyyətində deyil. Çox güman ki, məsələ seçkilərdən əvvəl həll ediləcək.

Müxalifət də vəziyyətdən istifadə etməyə çalışır və Qareginə “xalq səninlədir” mesajı verir. Aydındır ki, bu dəstək yalnız maraqlara xidmət edir. Qaregin müxalifətin gözləntilərini doğrultmasa, bu münasibət dərhal dəyişə bilər.

Ermənistan hökumətinin II Qareginə münasibəti açıq şəkildə sərtdir və kompromisə meylli görünmür. Mövcud şərtlər daxilində katolikosun seçkilərə qədər vəzifədən uzaqlaşdırılması real ehtimal kimi görünür. Bu proses Ermənistan daxilində kilsə ilə dövlət arasındakı münasibətlərin gələcək formatını da müəyyən edəcək. Qaregin getdikdən sonra kilsədə reformların olunması daha rahat ola bilər.

"The Daily Baku" redaksiyası