Ekspert: Süni intellekt üzrə data mərkəzlərinin yaradılması Azərbaycanın texnoloji inkişafı baxımından strateji əhəmiyyət daşıyır

Süni intellekt üzrə data mərkəzlərinin yaradılması Azərbaycanın texnoloji inkişafı baxımından strateji əhəmiyyət daşıyır.

Bunu "The Daily Baku" - ya açıqlamasında Azərbaycan Kibertəhlükəsizlik Təşkilatları Assosiasiyasının (AKTA) eksperti Rəşad Əliyev bildirib.

Onun sözlərinə görə, hazırda dünyada elə yüksək texnoloji avadanlıqlar mövcuddur ki, onların satışı və ixracı yalnız dövlət səviyyəsində xüsusi icazələrlə həyata keçirilir.  Məxsusilə xüsusi çiplərlə təchiz olunmuş süni intellekt əsaslı superkompüterlərin ölkəyə gətirilməsi geniş imkanlar açır. Bu texnologiyalar əsasında süni intellekt modellərinin hazırlanması, böyük həcmli məlumatların emalı və analitik simulyasiyaların aparılması mümkün olur.

Ekspert qeyd edib ki, bu cür infrastrukturun qurulması kibertəhlükəsizlik sahəsində də mühüm rol oynaya bilər.

 Belə ki, süni intellekt əsaslı sistemlər müdafiə mexanizmlərinin modelləşdirilməsi, mümkün təhdidlərin əvvəlcədən sınaqdan keçirilməsi və müxtəlif simulyativ testlərin aparılması üçün effektiv alətə çevrilir. Bu isə həm dövlət qurumlarının, həm də özəl sektorun təhlükəsizlik səviyyəsinin yüksəldilməsinə xidmət edir.

Rəşad Əliyev vurğulayıb ki, texnologiya sahəsində ABŞ-ın qlobal lider mövqeyi danılmazdır və bu istiqamətdə əməkdaşlıq xüsusi əhəmiyyət kəsb edir. ABŞ ilə təcrübə və bilik mübadiləsinin aparılması ölkədə mövcud kadr potensialının inkişafına, yeni mütəxəssislərin yetişməsinə və innovativ yanaşmaların formalaşmasına şərait yarada bilər. Bu proses eyni zamanda yeni texnoloji məhsulların və startapların meydana çıxmasını sürətləndirə bilər.

Onun fikrincə, dayanıqlı texnoloji ekosistemin formalaşdırılması üçün yeni məhsulların və startapların inkişafına sistemli dəstək vacibdir. Amerika bazarına çıxış imkanlarının genişlənməsi, birgə layihələr və şirkətlər arasında fikir və məlumat mübadiləsi daha güclü, rəqabətədavamlı və uzunmüddətli nəticələr verən məhsulların yaranmasına gətirib çıxara bilər.

Ekspert əlavə edib ki, bu cür əməkdaşlıq gələcəkdə texnologiya və kibertəhlükəsizlik sahəsində yarana biləcək risklərin daha effektiv idarə olunmasına, həmçinin strateji qərarların verilməsində elmi əsaslı tövsiyələrin hazırlanmasına mühüm töhfə verəcək.