Davosdan verilən mesajlar Azərbaycanın qlobal gündəlikdə mövqeyini bir daha sərgiləmiş oldu - ANALİTİKA

Davos İqtisadi Forumu qlobal siyasət və iqtisadiyyatın əsas istiqamətlərinin müəyyənləşdiyi mühüm beynəlxalq platformalardan biri kimi çıxış edir. Dünyanın aparıcı dövlət və hökumət başçıları, beynəlxalq təşkilatların rəhbərləri və transmilli şirkətlərin təmsilçiləri burada qlobal riskləri, iqtisadi çağırışları və yeni əməkdaşlıq imkanlarını müzakirə edirlər. Bu baxımdan Davos forumu təkcə fikir mübadiləsi deyil, həm də real siyasi və iqtisadi qərarların formalaşdığı nüfuzlu dialoq meydanıdır.

Bu Forumda Azərbaycan Prezidentinin iştirakı və səsləndirdiyi mesajlar bir daha göstərdi ki, Azərbaycan həm regional həm də qlobal proseslərin subyektinə çevrilib. Azərbaycan bu platformada iqtisadi imkanlarını, eyni zamanda siyasi baxışını, regional vizyonunu və sülhə dair konkret mövqeyini təqdim etdi. Davos tribunasından verilən mesajlar kifayət qədər güclü və aydın idi.

Prezident İlham Əliyevin çıxışında əsas xətt Cənubi Qafqazda formalaşmış yeni reallıqlar oldu. Dövlət başçısı açıq şəkildə vurğuladı ki, münaqişə mərhələsi geridə qalıb və artıq region üçün əsas məsələ dayanıqlı sülhün qurulmasıdır. Bu sülh isə Azərbaycanın müharibədən sonra irəli sürdüyü təşəbbüslər, siyasi iradəsi və ardıcıl diplomatik xətti nəticəsində formalaşıb.

Azərbaycan tərəfi Davosda bir daha nümayiş etdirdi ki, Rəsmi Bakı sülh prosesini konkret mexanizmlərlə, real layihələrlə və uzunmüddətli perspektivdə görür. Prezidentin çıxışında sülhün iqtisadi ölçülərinə xüsusi yer ayrılması təsadüfi deyildi. Çünki sülh, eyni zamanda nəqliyyat xətlərinin açılması, ticarətin bərpası və regionun iqtisadi inteqrasiyası deməkdir.

Bu kontekstdə Ermənistan Prezidentinin Davosda səsləndirdiyi nikbin fikirlər ayrıca diqqət çəkir. Onun əməkdaşlıq perspektivlərindən danışması dolayısı ilə Azərbaycanın yaratdığı yeni siyasi mühitdən irəli gəlir.

Bu dəfəki Davos İqtisadi Forumu çərçivəsində Prezident İlham Əliyevin dünya miqyasında tanınmış nəqliyyat-logistika, enerji, maliyyə və sənaye şirkətlərinin rəhbərləri ilə keçirdiyi görüşlər Azərbaycanın beynəlxalq siyasi və iqtisadi əlaqələrinin miqyasını və məzmun dərinliyini aydın şəkildə ortaya qoyur. Aparılan müzakirələr zamanı ölkəmizin strateji coğrafi mövqeyi, müasir nəqliyyat infrastrukturu və sabit iqtisadi mühiti xüsusi diqqət mərkəzində saxlanıldı.

Bərpa olunan enerji istiqamətində aparılan danışıqlar isə Azərbaycanın yaşıl enerji kursunun beynəlxalq müstəvidə müsbət qarşılandığını göstərir. Külək enerjisi və digər alternativ enerji mənbələri üzrə mümkün əməkdaşlıqlar ölkənin enerji siyasətinin uzunmüddətli və dayanıqlı inkişaf məqsədlərinə hesablandığını nümayiş etdirir. Bu yanaşma Azərbaycanın qlobal enerji transformasiyasında fəal iştirak etmək niyyətini də təsdiqləyir.

Prezident İlham Əliyevin Davos İqtisadi Forumunda fəal iştirakı Azərbaycanın qlobal iqtisadi və siyasi proseslərdə mühüm iştirakçı kimi mövqeyini bir daha ön plana çıxarır. Forum çərçivəsində qurulan təmaslar və aparılan dialoqlar ölkənin beynəlxalq nüfuzunu gücləndirməklə yanaşı, qlobal aktorlar üçün Azərbaycanla yeni tərəfdaşlıq imkanları açır və qarşılıqlı faydaya əsaslanan, uzunmüddətli əməkdaşlıq perspektivləri formalaşdırır.

The Daily Baku redaksiyası