Davosda Azərbaycanın artan qlobal çəkisi: güc, etimad və strateji planlama modeli

Davos İqtisadi Forumu artıq yalnız iqtisadi müzakirələrin aparıldığı platforma deyil, eyni zamanda dünyanın siyasi gündəminin formalaşdığı əsas qlobal mərkəzlərdən biridir. Prezident İlham Əliyevin dünya liderləri arasında seçilmiş iştirakçı kimi Davosda yer alması, keçirdiyi çoxsaylı ikitərəfli görüşlər və ona göstərilən xüsusi diqqət Azərbaycanın beynəlxalq gündəmdə artan rolunu açıq şəkildə nümayiş etdirir.

Bunu "The Daily Baku" - ya Milli Məclisin deputatı Tural Gəncəliyev deyib.

Tural Gəncəliyev qeyd edib ki, Prezident İlham Əliyevin Davosda dövlət və hökumət başçıları ilə yanaşı, transmilli korporasiyaların, iri investisiya fondlarının, yaşıl enerji, alternativ enerji mənbələri, nəqliyyat və logistika sahəsində fəaliyyət göstərən qlobal şirkətlərin rəhbərləri ilə keçirdiyi görüşlər Azərbaycanın artıq nümunəvi model ölkə kimi qəbul edildiyini göstərir. Onun fikrincə, Azərbaycan uzun illər ərzində ardıcıl şəkildə qurduğu infrastruktur layihələri ilə bu mövqeyə yüksəlib.

Deputat xatırladıb ki, Bakı–Tbilisi–Ceyhan neft kəməri ilə başlayan enerji strategiyası Bakı–Tbilisi–Ərzurum, Bakı–Tbilisi–Qars dəmir yolu, Cənub Qaz Dəhlizi, TANAP və TAP layihələri ilə davam etdirilərək bu gün Avropa üçün strateji əhəmiyyət daşıyan enerji arxitekturasına çevrilib. 

"Bu layihələr Azərbaycanın etibarlı tərəfdaş imicini möhkəmləndirib.

Azərbaycanın Orta Dəhlizdə oynadığı rol xüsusi əhəmiyyət kəsb edir. Artıq bu dəhliz təkcə neft və qaz kimi ənənəvi enerji resurslarının daşınması ilə məhdudlaşmır, eyni zamanda Avrasiya və Türküstan məkanından Avropaya yaşıl enerji və alternativ enerji resurslarının ixracını da nəzərdə tutur. Bu layihələrin təşəbbüskarı və əsas icraçılarından biri məhz Azərbaycandır. Təsadüfi deyil ki, Orta Dəhlizin əsas açar komponenti kimi Azərbaycan qəbul olunur".

Deputat vurğulayıb ki, Azərbaycan həm Şərq–Qərb, həm də Şimal–Cənub nəqliyyat-kommunikasiya xətlərinin üzərində yerləşən, bu marşrutların təhlükəsizliyini və sabitliyini təmin edən aparıcı ölkəyə çevrilib. 

"Ermənistan–Azərbaycan münaqişəsinin başa çatması, regionda məhdudiyyətlərin aradan qaldırılması Azərbaycanın dərin strateji planlamasının nəticəsidir və ölkəmizin iqtisadi-siyasi güc hesabına regionda yeni əməkdaşlıq mühiti formalaşdırdığını göstərir" .

Tural Gəncəliyev qeyd edib ki, beynəlxalq hüququn və klassik beynəlxalq təşkilatların əvvəlki təsir gücünü itirdiyi bir dövrdə qlobal güc mərkəzləri real təhlükəsizlik, siyasi sabitlik və iri layihələrin icra potensialına malik ölkələrlə əməkdaşlığa üstünlük verirlər. Azərbaycan bu baxımdan həm hərbi-siyasi qələbə əldə etmiş, həm də geoiqtisadi layihələri uğurla həyata keçirən dövlət kimi xüsusi maraq doğurur.
Deputatın fikrincə, Davosda Prezident İlham Əliyevin "BlackRock" , "JP Morgan" kimi dünyanın aparıcı investisiya və aktiv idarəetmə şirkətləri, Avropa İttifaqı ölkələrinin nümayəndələri, eləcə də Yaxın Şərqin strateji tərəfdaşları, o cümlədən Qətər ilə keçirdiyi görüşlər Azərbaycanın bütün istiqamətlər üzrə etibarlı və cəlbedici tərəfdaş kimi qəbul edildiyini təsdiqləyir.

O bildirib ki, Qarabağ və Şərqi Zəngəzurun işğaldan azad edilməsindən sonra yaşıl enerji gündəliyi Azərbaycanın strateji prioritetinə çevrilib. 

"Bu gün Azərbaycan artıq təkcə neft və qaz ixracatçısı deyil, həm də yaşıl enerji və yaşıl hidrogen istehsal edib ixrac etməyə hazırlaşan ölkə kimi dəyərləndirilir. Bu istiqamətdə 2030-cu ildən sonrakı dövrü əhatə edən konkret strateji sənədlər və planlar mövcuddur."

Deputat əlavə edib ki, Davos İqtisadi Forumunun 2026–2028-ci illər üçün qlobal risklər hesabatında qeyd olunan əsas çağırışlar – ticarət müharibələri, dövlətlərarası münaqişələr, süni intellekt və rəqəmsal risklər fonunda Azərbaycanın mövqeyi ayrıca diqqət çəkir. Azərbaycan regional münaqişəni həll edərək riskləri azaldan ölkə kimi çıxış edir, enerji təhlükəsizliyinə real töhfələr verir və süni intellekt, rəqəmsallaşma və kibertəhlükəsizlik sahələrində mühüm addımlar atır.

Tural Gəncəliyev vurğulayıb ki, 44 günlük Vətən müharibəsi dövründə kibertəhlükəsizlik sahəsində əldə edilən təcrübə və sonrakı dövrdə bu sahəyə artan diqqət Azərbaycanın Davos platformasında qlobal risklərin müzakirəsində etibarlı tərəfdaş kimi çıxış etməsinə imkan yaradır. 

"Azərbaycanın təcrübəsinin Davosda paylaşılması və qlobal risklərin idarə olunmasında rolunun qiymətləndirilməsi ölkəmizin artan beynəlxalq nüfuzunun göstəricisidir"