BMTM-in şöbə müdiri Mətin Məmmədli və aparıcı məsləhətçi Sultan Zahidovun birgə müəllifi olduqları “Müasir münaqişələr və Azərbaycan nümunəsi” adlı təhlil dərc edilib

BMTM-in şöbə müdiri Mətin Məmmədli və aparıcı məsləhətçi Sultan Zahidovun birgə müəllifi olduqları “Müasir münaqişələr və Azərbaycan nümunəsi” adlı təhlil dərc edilib.

Təhlildə qlobal təhlükəsizlik arxitekturasının mövcud vəziyyəti fonunda “Azərbaycan modeli”nin uğurlu nümunə olduğu və münaqişələrin həllində alternativ, praktik yanaşma kimi ön plana çıxdığı vurğulanır.

Qeyd olunur ki, geosiyasi rəqabətin artması, beynəlxalq hüququn selektiv tətbiqi və böyük güclər arasındakı qarşıdurma şəraitində münaqişələr həm coğrafi baxımdan genişlənir, həm də intensivləşir. Bu münaqişələr əsasən uzunmüddətli, hibrid xarakter daşıyır və qeyri-müəyyən nəticələri ilə qlobal iqtisadiyyata və siyasi sabitliyə ciddi təsir göstərir.

Müəlliflərin fikrincə, bu ümumi mənzərə fonunda Azərbaycan nümunəsi fərqli model kimi seçilir. Keçmiş Ermənistan-Azərbaycan münaqişəsinin həlli göstərdi ki, hərbi, siyasi və iqtisadi alətlərin koordinasiyalı tətbiqi konkret və həlledici nəticələrin əldə olunmasına imkan verir. 2020-ci il Vətən müharibəsi və 2023-cü il antiterror tədbirlərində əldə olunan uğurlar “Azərbaycan modeli”nin effektivliyini təsdiqləyir. Bu model iqtisadi gücün (xüsusilə enerji resurslarının) möhkəmləndirilməsi, hərbi potensialın müasir standartlara uyğun inkişafı, eləcə də praqmatik və çoxvektorlu xarici siyasət kimi əsas sütunlara söykənir:

“Əsası ötən əsrin 90-cı illərində Ulu Öndər Heydər Əliyev tərəfindən qoyulmuş və daha sonra Prezident İlham Əliyevin davam etdirdiyi bu siyasi dəst-xəttin başlıca məqsədi erməni işğalını aradan qaldırmaqla Azərbaycanın ərazi bütövlüyü və suverenliyini bərpa etmək idi”.

Təhlildə uğuru şərtləndirən əsas mərhələlər xronoloji ardıcıllıqla təqdim olunur, ikitərəfli təmaslar və qəbul edilmiş sənədlər ətraflı şəkildə izah edilir.

Yekunda vurğulanır ki, müasir dünyada əksər münaqişələr uzanan və qeyri-müəyyən xarakter daşıdığı halda, Azərbaycan nümunəsi qəti nəticə ilə başa çatan nadir hallardan biri kimi qiymətləndirilə bilər. Bu isə onu münaqişələrin həllində alternativ və praktik yanaşma modeli kimi ön plana çıxarır.