Azərbaycanlı gənc dünya reytinqində 2-ci universitetə qəbul qazandı

Azərbaycanlı tələbə dünyanın ən nüfuzlu ali təhsil müəssisələrindən birinə qəbul olunaraq mühüm akademik uğura imza atıb.

ADA University-də beynəlxalq münasibətlər ixtisası üzrə təhsil alan Nübar Cəbrayıl QS World University Rankings reytinqinə əsasən dünyanın ən yaxşı ikinci universiteti hesab olunan Imperial College London-a qəbul olunub.

O, Ətraf Mühit Texnologiyaları proqramı çərçivəsində Ətraf Mühit İqtisadiyyatı və Siyasəti ixtisası üzrə təhsil almaq üçün təklif əldə edib. Sözügedən proqram Imperial College London Faculty of Natural Sciences tərkibində fəaliyyət göstərir və Grantham Institute – Climate Change and the Environment tərəfindən təklif olunur. Bu mərkəz Böyük Britaniyada ətraf mühit tədqiqatları sahəsində uzun illərdir aparıcı mövqedədir.

Bakı Oksford Məktəbinin məzunu olan Nübar Cəbrayıl hazırda ADA Universitetində təhsilini fərqlənmə ilə başa vurmaq üzrədir. O, təhsil müddətində Ministry of Foreign Affairs of Azerbaijan daxil olmaqla bir sıra qurumlarda təcrübə keçib və universitet daxilində fəaliyyət göstərib.

Tələbə həmçinin Fransada siyasi elmlər üzrə təhsil alıb və onun elmi tədqiqat işi 2025-ci ildə University College London-da keçirilən XI ICCEES World Congress çərçivəsində təqdim olunub.

Beş xarici dil bilən Nübar Cəbrayılın IELTS nəticəsi 9 üzərindən 8.5 olub.

Qeyd edək ki, o, gələcəkdə ətraf mühit iqtisadiyyatı və siyasəti sahəsində fəaliyyət göstərməyi və bu istiqamətdə Azərbaycanda tədqiqatlar aparmağı planlaşdırır.