Azərbaycanla Türkiyə arasında ticarət dövriyyəsi 5,2 milyard dolları ötüb

Bu ilin yanvar-noyabr aylarında Azərbaycanla Türkiyə arasında ticarət əməliyyatlarının həcmi 5,200 milyard ABŞ dolları təşkil edib.

"The Daily Baku" xəbər verir ki, bu barədə Dövlət Gömrük Komitəsindən Trend-ə bildirilib.

Məlumata əsasən, bu, 2024-cü ilin eyni aylarındakı göstərici ilə müqayisədə 424,3 milyon ABŞ dolları və ya 7,5% azdır.

Hesabat dövründə Türkiyə ilə ticarət dövriyyəsi Azərbaycanın ümumi ticarət dövriyyəsinin 11,66%-i həcmində olub. Bununla da sözügedən ölkə hesabat dövrü ərzində Azərbaycanın ən çox ticarət əməliyyatları apardığı ölkələr sırasında 2-ci pillədə qərarlaşıb.

Cari ilin yanvar-noyabr aylarında Azərbaycandan Türkiyəyə 3,076 milyard dollarlıq məhsul ixracı qeydə alınıb. Bu, ötən ilin eyni dövrü ilə müqayisədə 440 milyon ABŞ dolları və ya 12,5% azdır. Bununla da hesabat dövründə Türkiyə Azərbaycanın ən çox məhsul ixrac etdiyi ölkələr sırasında 2-cü pillədə qərarlaşıb.

Dövr ərzində Türkiyəyə ixrac edilən məhsulların 69 milyon ABŞ dollarını bitumlu süxurlardan alınmış xam neft və xam neft məhsulları təşkil edib. Bu dəyərdə sözügedən məhsulun ixracının həcmi isə 142,4 min ton təşkil edib. Beləliklə, ötən ilin eyni dövrü ilə müqayisədə Azərbaycandan Türkiyəyə ixrac edilmiş bitumlu süxurlardan alınmış xam neft və xam neft məhsullarının dəyəri 132,6 milyon ABŞ dolları və ya 2,9 dəfə, həcmi isə 227,2 min ton və yaxud 2,6 dəfə azalıb.

Bundan başqa, bu ilin ilk 11 ayında Türkiyəyə ixrac olunan məhsulların 546,1 milyon manatını qeyri-neft məhsulları təşkil edib ki, bu da illik müqayisədə 39 milyon dollar və ya 7,7% çoxdur.

Dövr ərzində Türkiyəyə qeyri-neft məhsulları ixracı ümumi ixraca nisbətən 16,46% paya malik olub. Bu göstərici ilə Türkiyə Azərbaycanın ən böyük qeyri-neft məhsulları alıcıları sırasında 2-ci pillədə qərarlaşıb.

Hesabat dövründə Türkiyədən Azərbaycana isə 2,125 milyard ABŞ dolları dəyərində ixrac əməliyyatları icra olunub ki, bu da 2024-cü ilin eyni dövrü ilə müqayisədə 15,7 milyon ABŞ dolları və ya 0,7% artım deməkdir. Bununla da hesabat dövründə Türkiyə Azərbaycanın ən çox məhsul idxal etdiyi ölkələr sırasında 3-cü pillədə qərarlaşıb.

Qeyd edək ki, bu ilin yanvar-noyabr aylarında Azərbaycan xarici ölkələrlə 44,589 milyard ABŞ dolları dəyərində ticarət əməliyyatı aparıb. Bu, ötən ilin eyni dövrünə nisbətən 1,480 milyard dollar və ya 3,4% çoxdur.

Xarici ticarət dövriyyəsinin 23,401 milyard ABŞ dolları ixracın, 21,188 milyard ABŞ dolları isə idxalın payına düşüb. Son 1 ildə ixrac 937 milyon dolar və ya 3,8% azalıb, idxal isə 2,416 milyard dollar və ya 12,9% artıb.

Yekunda xarici ticarətdə 2,213 milyard dollarlıq müsbət saldo yaranıb ki, bu da illik müqayisədə 3,353 milyard dollar və ya 2,5 dəfə azdır.