İran İslam Respublikasının “Tasnim” xəbər agentliyi ölkə prezidenti Məsud Pezeşkiyanın video müraciətini yayıb.
Müraciətdə əsas məsələ İranın qonşu ölkələrə hücumları ilə bağlıdır. Prezident Pezeşkiyan qonşu ölkələrdən aşağıdakı şəkildə üzr istəyib:
Mən burada lazım bilirəm ki, hücuma məruz qalan qonşu ölkələrdən İran adından və öz adımdan üzr istəyim.
O, hücumları ölkə rəhbərliyinin öldürülməsi nəticəsində komanda-idarəetmə sistemində yaranmış boşluqla və hərbçilərin siyasi rəhbərlik olmadığı şəraitdə müstəqil şəkildə qərar qəbul etmək məcburiyyətində qalmaları ilə izah edib.
Ən əsası isə Pezeşkiyan bildirib ki, dünən İranın Müvəqqəti Rəhbərlik Şurası Silahlı Qüvvələrə qonşu ölkələrə qarşı hücumların dayandırılması barədə göstəriş verib.
Xatırladaq ki, İran silahlı qüvvələri iki gün əvvəl - 5 mart 2026-cı il tarixində Naxçıvana hücum etmişdi. Bundan sonra Azərbaycan tərəfi silahlı qüvvələrini bir nömrəli döyüş hazırlığı vəziyyətinə gətirərək İrandan hücuma görə üzr istəməyi və günahkarların cəzalandırılmasını tələb etmişdi.
İran Baş Qərargahının hücumun onların tərəfindən həyata keçirilmədiyi barədə bəyanatını Azərbaycan Müdafiə Nazirliyi rədd etmişdi. Daha sonra İranın xarici işlər naziri hadisə ilə bağlı araşdırma aparıldığını bildirmişdi. Azərbaycan tərəfi isə İranın dərhal üzr istəməsi tələbində israr etmişdi. Az sonra Pezeşkiyanın bu video müraciəti yayımlandı.
Göründüyü kimi, Azərbaycanın qətiyyətli mövqeyi artıq müəyyən nəticələr verib. İran hökuməti üzr istəyib və region ölkələrinə bir daha hücum etməyəcəyini bildirib. Bu addımı Azərbaycanın nə dərəcədə yetərli hesab edəcəyi hələlik məlum deyil. Həmçinin, İranın bir daha hücum etməmək barədə verdiyi vədlərə nə dərəcədə əməl edəcəyini də zaman göstərəcək. Hər halda, Azərbaycanın qətiyyətli mövqeyi sayəsində region ölkələrini İranın hücumlarından xilas etdiyi görünür.
The Daily Baku redaksiyası
© 2026 The Daily Baku. Bütün hüquqlar qorunur.