Çinin Quandon əyalətinin Quancou şəhərində Çin-Azərbaycan investisiya və ticarət əməkdaşlığına həsr olunmuş forum keçirilib.
"The Daily Baku" İqtisadiyyat Nazirliyinə istinadən xəbər verir ki, "Şirkətlərə dəstək, xarici bazarlara çıxış" devizi altında təşkil olunan Çin (Quandon Əyaləti) - Azərbaycan İnvestisiya və Ticarət Əməkdaşlığı Forumu Azərbaycanın Çində ticarət nümayəndəsinin aparatı və Çinin aidiyyəti qurumlarının dəstəyi ilə baş tutub. Tədbirin keçirilməsində əsas məqsəd Azərbaycanın biznes və investisiya mühitinin Quandonda tanıdılması, bu əyalətdən Azərbaycana investisiyaların cəlb olunması, habelə "Made in Azerbaijan" məhsullarının Çinin Quandon əyalətinə ixracının artırılması imkanlarının müzakirəsi olub.
Forumda dövlət qurumlarının, biznes assosiasiyalarının, ixrac və investisiya fəaliyyəti ilə məşğul olan şirkətlərin nümayəndələri iştirak ediblər.
Tədbirdə Azərbaycanın Çində ticarət nümayəndəsi Teymur Nadiroğlu ölkəmizin işgüzar mühiti haqqında məlumat verib. O, Azərbaycanın Çin ilə iqtisadi-ticarət əlaqələrinin inkişafına xüsusi önəm verdiyini vurğulayıb, ölkəmizin regionda mühüm nəqliyyat-logistika qovşağı kimi rolundan, qeyri-neft-qaz sektorunun inkişafı istiqamətində həyata keçirilən tədbirlərdən, xarici investorlar üçün yaradılan əlverişli şəraitdən danışıb. Bildirilib ki, Azərbaycan Şərqlə Qərb, Şimalla Cənub arasında etibarlı bağlantı nöqtəsi olmaqla yanaşı, sabit biznes mühiti və geniş investisiya imkanları ilə seçilir.
Quandon Əyaləti Sənaye və Kommersiya Federasiyasının baş katibi Quan Sianmin Azərbaycanla iqtisadi əlaqələrin inkişafı üçün geniş potensialın mövcud olduğunu bildirib. Qeyd olunub ki, Azərbaycanın əlverişli coğrafi mövqeyi, tranzit imkanları, regional bazarlara çıxış üstünlükləri və investisiya mühiti Çin şirkətləri üçün yeni əməkdaşlıq imkanları yaradır.
Forumda Azərbaycanda investorlar üçün tətbiq olunan imtiyaz və güzəştlər haqqında təqdimat keçirilib.
Pekində fəaliyyət göstərən Azərbaycan Ticarət Evinin operatoru olan "Sino-Foreign Economic Cooperation (Beijing) Science & Trade Co., Ltd." şirkətinin baş direktoru Van Veyvey Çindəki Azərbaycan ticarət evlərinin fəaliyyəti, ölkəmizin keyfiyyətli qida və içki məhsullarının Çin bazarında satış kanallarının genişləndirilməsi istiqamətində görülən işlərdən danışıb.
Tədbirdə iştirakçı şirkətlərin nümayəndələrinin Azərbaycanın işgüzar mühiti, güzəşt mexanizmləri, logistika marşrutları və Çin bazarında Azərbaycan məhsullarının təşviqi ilə bağlı sualları cavablandırılıb.
Forum çərçivəsində Azərbaycan və Çin şirkətləri arasında potensial əməkdaşlıq istiqamətlərinə dair fikir mübadiləsi aparılıb.
© 2026 The Daily Baku. Bütün hüquqlar qorunur.