AKTA-nın ekspert komitələrinə yeni sədr və katiblər təyin olunub

Azərbaycan Kibertəhlükəsizlik Təşkilatları Assosiasiyasının (AKTA) 2025-ci il üzrə qəbul etdiyi qərara əsasən, təşkilatın ekspert komitələrinin yeni sədr və katibləri müəyyən edilib.

"The Daily Baku" xəbər verir ki, qərara əsasən, AKTA-nın fəaliyyət istiqamətlərini əhatə edən dörd əsas komitə üzrə rəhbər heyət formalaşdırılıb.

Belə ki, Təhsil, tədris və insan resursları komitəsinə AKTA-nın qızıl üzvü, Code Academy şirkətinin Baş icraçı direktoru Ülvi Aslanov sədr, informasiya texnologiyaları üzrə mühəndis-tədqiqatçı, AKTA eksperti Bəhruz Əliyev isə katib təyin edilib.

Kibertəhdidlərə qarşı mübarizə, texniki məsələlər və prosedurlar komitəsinə AKTA-nın qızıl üzvü, Upgrade Solutions MMC-nin təsisçisi Araz Mirzəyev sədr, həmin şirkətin Baş informasiya inzibatçısı, AKTA-nın qızıl üzvü Şahmar Həsənli isə katib seçilib.

Yerli həllər, məhsullar, innovasiya və startaplar komitəsinə AKTA-nın qızıl üzvü, Techpro DC şirkətinin Kommersiya direktoru Mircəlal Bağırov sədr, Brandefense şirkətinin regional satış meneceri, AKTA eksperti Rövşən Məmmədov isə katib təyin olunub.

Hüquq, risk və uyğunluq komitəsinə (GRC) isə AKTA eksperti, Kapital Bankın İnformasiya təhlükəsizliyi departamentinin direktor müavini Kamran Kərimov sədr, SOCAR şirkətinin baş mühəndisi, AKTA eksperti Xədicə Tağızadə Bürcəliyeva katib seçilib.

Qeyd edək ki, yeni təyinatlar AKTA-nın fəaliyyətinin daha da gücləndirilməsi, kibertəhlükəsizlik sahəsində koordinasiyanın artırılması və institusional inkişafın sürətləndirilməsi məqsədi daşıyır.