ABŞ-da Maduro əməliyyatı qalmaqalı: hərbçi gizli məlumatla 400 min dollar qazandı

ABŞ Venesuela Prezidenti Nicolás Maduronun ələ keçirilməsi əməliyyatında iştirak etmiş hərbçiyə qarşı ittiham irəli sürüb. Bildirilir ki, xüsusi təyinatlı qüvvələrin üzvü olan hərbçi gizli məlumatlardan istifadə edərək onlayn mərc platformasında 400 min dollardan çox gəlir əldə edib.

Nyu-York prokurorluğunun açıqlamasına görə, Gannon Ken Van Dyke 2026-cı ilin yanvarında həyata keçirilən əməliyyatda iştirak edib və missiyaya dair məxfi məlumatlardan istifadə edərək Polymarket platformasında qazanc əldə edib.

ABŞ Ədliyyə Nazirliyi ona qarşı məxfi dövlət məlumatlarından qanunsuz istifadə, hökumətə məxsus məlumatların oğurlanması, əmtəə fırıldaqçılığı, elektron rabitə vasitələri ilə dələduzluq və qanunsuz maliyyə əməliyyatları aparılması maddələri ilə ittiham irəli sürüb. Onu uzunmüddətli həbs cəzası gözləyir.

Kash Patel bildirib ki, söhbət guya öz vəzifəsindən istifadə edərək qanuni hərbi əməliyyatdan şəxsi qazanc əldə edən ABŞ hərbçisindən gedir.

Xatırladaq ki, ABŞ Prezidenti Donald Trump yanvarın 3-də Venesuelada uğurlu əməliyyat keçirildiyini açıqlamışdı. Onun sözlərinə görə, Maduro və həyat yoldaşı Cilia Flores saxlanılaraq ölkə ərazisindən çıxarılıb.

Yanvarın 5-də Maduro və həyat yoldaşı Nyu-York məhkəməsi qarşısına çıxarılıb. O, özünü təqsirli bilmədiyini və hələ də ölkəsinin prezidenti olduğunu bildirib. ABŞ məhkəməsi Venesuela konsulluq əməkdaşlarının onunla görüşünə icazə verib.

Maduro işi üzrə ikinci məhkəmə iclası 26 mart 2026-cı ildə Nyu-York federal məhkəməsində hakim Alvin Hellerstein sədrliyi ilə keçirilib.